Post box Hong Kong
全港
英國皇冠郵筒 大搜查
如果你係英屬香港居民，一定會好清楚殖民歷史，亦都知道英國曾經喺香港豎立一個又一個皇冠郵筒。而呢種被髹上紅色嘅皇冠郵筒，喺英國街頭基本上隨處可見，但香港已經變得非常罕有，因為唔少已變成綠色蜂鳥郵筒，只係剩低幾十個皇冠郵筒仍然服役；而當中有幾個並無英國皇冠標誌，亦有無數個皇冠郵筒被重新髹上綠色，故大多數仍服役嘅皇冠郵筒都係綠色，紅色變得極為罕有。今次E.A.Two編輯就決定按圖索驥，帶大家拍拖兩個人一次過搵晒全香港仍舊存在嘅皇冠郵筒，由維多尼亞時代走到伊利沙伯二世時代，拆解每一個皇冠郵筒背後嘅歷史意義。
以前要同人溝通聯絡，我哋通常會採用書信模式，文字係表達情感嘅工具，而書信就可以用作傳遞。除咗私人通信，商界、公司文件往來等都會以郵寄作為主要橋樑，故香港郵筒曾經係重要嘅投寄工具，豎立皇冠郵筒都係為咗方便市民需要。不過時而勢易，隨住資訊科技日漸發達，大家都已經一步步改用電郵或電話來溝通，寄信呢個行為變得唔再重要，而郵筒使用頻率亦逐漸降低，再加上香港主權移交，皇冠郵筒數量日益減少。
小知識 Knowledge
香港郵政係來自英國皇家郵政（Royal Mail），有指本來全港有近千個郵筒，而香港嘅皇冠郵筒亦同英國大同小異，都係當年由英國製造，再運送嚟香港。事實上，英國皇冠郵筒喺香港已經有逾百年歷史，係英國殖民時期嘅文化產物。舊有嘅紅色皇冠郵筒呈「威尼斯紅」，用色搶眼，紅色郵筒狀甚型格，亦帶上幾分獨立性格；而由1997年5月起嘅方形蜂鳥郵箱已經換上新衣，新裝呈「綠松石綠」、「香水草紫」，用色現代化，郵箱上既有鳥翼圖案，亦寫有「P」字，象徵郵政嘅「Post」，原意解讀為快捷、親切、效率。同時，將多個仍舊保存嘅皇冠郵筒皆髹成「碧綠」至「綠松石綠」，因為中國郵政向來以綠色為主。原先郵筒充滿英式風格，一直係香港主權移交之前代表英國皇權嘅產物，滿滿濃厚英國色彩。結果大多數皇冠郵筒都已經由紅色變綠色，情況都係一種香港人嘅歷史見證。
鑄造廠
據悉，最早嘅英國郵筒可以追塑至1809年，只係一個小型鐵製郵筒，設於WAKEFIELD郵局，而英國街頭郵筒亦於1851年起先開始安放及推廣。最初，郵筒經當地郵政局委任鑄造廠Andrew Handyside and Company of Derby鑄造，該製造商係現時香港皇冠郵筒嘅其中一個製造商，香港嘅英式郵筒同樣以生鐵鑄造，容量大之餘亦非常耐用，歷經百年依舊堅固如新。
不過，大約喺80年代起，郵筒唔再由英國運送到港，反而改由本地供應商製造，甚至由懲教署生產，採用玻璃纖維製造，有指每個方箱形郵箱造價約1600至2200蚊，另外亦有唔少圓拱形郵筒，而1998年中環娛樂行外嘅編號330郵筒，更加係由本地供應商於內地設廠建造，故其實正宗英國鑄造、擁有皇徽嘅郵筒已經極為罕有。
郵筒類型
英式皇冠郵筒多數為圓柱形，少部份為橢圓形，筒形柱體類係最常見嘅郵筒，亦係英國當地最標準嘅郵筒。而部份郵筒則會以入牆式、嵌牆式、燈箱式呈現，有啲會係方形掛牆、掛柱式郵箱，亦有啲為有啲甚至係木製方形郵箱。郵筒投信口本來為直置式，後來經過多方改良，先變成橫置式，一直沿用至今。
郵筒編號
至於每個郵筒編號點計算呢？事實上，郵政署係將港島劃分一個系列編號，包含離島、大嶼山、東涌、馬灣地區，有渡輪往來中區郵政總局，直到2004年，編號達378號；而九龍、新界就劃分另一個系列嘅編號，包含昂船州、青衣、大嶼山北嘅東涌部份、赤臘角，直至2004年，編號達622號。
方形小牌
如果再細心啲留意吓，會發現郵筒上有個小牌，其實顯示收信時間，質地似係熨膠牌，主權移交之後大概係藍綠色，另外重有一個方形小牌，上面數字係指嗰日第幾次收信，通常係白色，但星期日就會係紅色，而黃色就係代表公眾假期時嘅次數。每一個皇冠郵筒可以容納約1800至2800封信，嵌牆式郵箱亦可以容納600多封信，而最細嘅燈箱形郵箱都可以容納300至400封信，至於較新嘅本地郵箱就可以容納2500至5000封信。
至於郵筒退役後，會放到邊度呢？事實上，各種郵筒會先放喺郵局貨倉，隨後經過翻新，有機會放置於郵政總局郵展廊或博物館展覽，又或者係推出公開拍賣，曾經被拍賣嘅郵筒多為伊利沙伯二世圓柱形郵筒、嵌牆形郵箱、懸掛式燈柱郵箱，但大多數都只係被儲存或被棄置。
歷史介紹 History
而香港喺1841年開埠，由該年至1997年，經歷六位君主，當中有維多利亞女王、英皇愛德華七世、英皇佐治五世、英皇佐治六世，以及香港人比較熟悉嘅「英女皇」伊利沙伯二世，每一個君主都會於香港街頭設立標準鐵鑄郵筒，而每個郵筒上都鑄有當時嘅皇冠標記、英國皇室徽號。另外，好多人都記得英國皇冠郵筒，但你又知唔知郵筒上面嘅GR或ER字母係咩意思呢？
Queen Elizabeth II
（伊利沙伯二世）
1952至1997
英國皇冠郵筒上嘅皇冠就代表皇室標誌，係英國君主嘅皇家徽號，整個圓柱形郵筒重量約一千磅，筒身不單有「Post Office」字樣，亦鑄有皇冠圖案，而皇冠以下字母就係一種「Royal Cypher」，代表建立郵筒時嘅在位君主，都係一種皇室徽號暗示模式。現時香港人最熟悉、由1952至1997年嘅在位君主為Queen Elizabeth II（伊利沙伯二世），以我哋見得最多嘅「ER」皇冠郵筒為例，每個「伊利沙伯二世」時期建立嘅皇冠郵筒都鑄刻有「EIIR」，事實上「E」係代表「Elizabeth」，而羅馬數字「II」等同「2」，即係「二世」。郵筒上面亦有愛德華皇冠，至於「R」則係拉丁文「Regina」縮寫，係代表女性君主時期建立，象徵「女皇」嘅意思，咁男性君主時期嘅郵筒上面又點寫呢？
King George V（英皇佐治五世)
1910至1936年
King George VI（英皇佐治六世）
1936至1952
講到男性君主時期建立嘅皇冠郵筒，就以1910至1936年嘅在位君主為King George V（英皇佐治五世）、以及1936至1952嘅在位君主為King George VI（英皇佐治六世）嘅郵筒為例，數量上僅次於「伊利沙伯二世」鑄造嘅郵筒，郵筒上都鑄刻有「GR」，而「GR」就代表「英皇佐治」，亦有人稱為「英皇喬治」，其實只係翻譯唔一樣，因為「G」本身就代表「George」。至於「R」就係「Rex」縮寫，象徵「皇帝」，而「Rex」則同「Regina」一樣係拉丁文嚟，至於「V」、「VI」就係代表「5」或「6」嘅羅馬數字，字體為美術草書，目前仍然可於街頭見到少部份英皇佐治時代嘅郵筒。而香港亦有部份英式郵筒同上述有別，例如係採用Scottish 蘇格蘭皇冠，有啲甚至係無郵徽嘅英式郵筒。
King Edward VII（英皇愛德華七世）
King Edward VIII（英皇愛德華八世）
而1901至1910年嘅在位君主為King Edward VII（英皇愛德華七世），不過君主只係在位十年，鑄造嘅郵筒唔多，故此香港嘅愛德華年代郵筒本身好少，目前更加難以找尋。本身重有一個位處港島麥當奴道11號嘅編號20圓柱形郵筒，為粗圓柱形（Pillar Type A）郵筒，同樣由Andrew Handyside and Company of Derby鑄造。筒身亦鑄有「VII」、「ER」字樣，代表「7」同「愛德華皇帝」嘅嘅羅馬數字「VII」、「Edwardus Rex」縮寫，上面有愛德華皇帝皇冠徽號，字體為美術草書。另外，翻查資料時再發現，其實英皇佐治五世與英皇佐治六世之間其實重有一個King Edward VIII（英皇愛德華八世）嘅皇朝，本身郵筒製造商已經鑄造好一批鑄有「ER」、「VIII」嘅郵筒，不過君主只係在位8個月就傳位，所以就未有運送到香港，而英國當地都比較少見。
Queen Victoria
（維多利亞女王）
據香港歷史資料顯示，1837至1901年嘅在位君主為Queen Victoria（維多利亞女王），由於年代歷史久遠，香港嘅維多利亞時代嘅皇冠郵筒已經少之又少，本來重有九龍東隆道與樂善道交界嘅編號278郵筒，現時就僅餘中環郵政總局郵展廊、尖沙嘴香港歷史博物館內嘅兩個郵筒展示品，由Andrew Handyside and Company of Derby鑄造，被當作文物保存。本來係位處羅便臣道與舊山頂道交界嘅編號21郵筒、油麻地窩打老道與砵蘭街交界嘅編號25郵筒，係本地最老嘅郵筒，兩個都係屬於幻圓柱形（Pillar Type B）嘅皇冠郵筒，筒身鑄有「QV」或「VR」字樣，係「維多利亞女王」英文「Victoria Regina」嘅縮寫。
以本地碩果僅存嘅皇冠郵筒嚟講，大多數都係伊利沙伯二世時代產物，而我哋比較熟悉嘅「英女皇」伊利沙伯二世，英文本來就叫「Elizabeth II」，所以大多數皇冠郵筒都能夠清楚見到係刻有「ER」字樣，而鑄刻「GR」、象徵「英皇佐治」嘅皇冠郵筒數目較少，只係仍然可見。另外，香港至今已難以再搵到象徵「維多利亞女王」嘅「VR」皇冠郵筒、代表「英皇愛德華七世」嘅「ERVII」皇冠郵筒，前者只能夠喺香港歷史博物館及香港郵政總局見到展示品。
雖然部份原裝紅色圓柱形皇冠郵筒被香港政府保留作展示用途，香港郵政亦於1991年、2001年曾推出150、160週年皇冠郵筒紀念郵票。皇冠郵筒係證明英國君主曾經統治香港嘅其中一種文化產物，不過香港政府成立之後，一度有人指疑似已經逐步「去殖」。根據郵政署2009年4月資料顯示，當時仍保留嘅英式郵筒有約58個，同1997年主權移交後基本相近，新界有28個、九龍有18個、港島及離島有12個。直到2015年10月，郵政署新聞公報又指出，政府表示古郵筒上嘅皇冠標記同英國皇室徽號已經唔合適，係不合時宜，準備更改郵筒上嘅標記，聲稱會研究保育方法，同時聆聽唔同意見。該年資料又顯示，當時有約1150個郵箱，而以生鐵鑄造嘅舊式英國皇冠郵筒有59個。到最後，不單將郵筒上嘅皇冠標記遮蓋，而且更將整個紅色皇冠郵筒髹上綠色顏料，甚至將皇冠郵筒移除，清一色以蜂鳥標記裝飾嘅綠色方形特區郵筒取締，正式改朝換代。而現時據E.A.Two編輯親身考證之下，除咗去唔到嘅地方之外，可以估計到香港僅餘嘅舊式英國郵筒約有76個，約有4個係並英國皇室標誌。
由1997年7月起，英國就將主權移交，正式成立HKSAR（香港特別行政區），而香港郵政由1841年成立至今則有181年。事實上，大多數市區嘅皇冠郵筒都已經退役，只剩低寥寥幾個，而能夠保留嘅皇冠郵筒，目前多數分佈於偏僻地方，只有該區居民會經常經過，尤其係新界村屋附近，又或者係正正因為過於偏僻，所以先獲得保留。皇冠郵筒到底對政權有幾大威脅，E.A.Two編輯真係不得而知，亦無從判斷，故此亦無打算多講，只想著眼於本土歷史文化層面上研究。
郵筒位置分佈
