Cafe Koinonia

沙田圍文青Cafe藏日式包廂 焦糖瑪琪朵香甜不膩



[sp_html5video category=”2433″]

好多人會去沙田,但沙田圍就比較少人會入去,區內有一間隱密嘅良心小店,小小咖啡室暗藏圓洲角,文青味十足,食物即叫即整,主打採用明治鮮奶嘅咖啡、牛角包同意粉,款款唔交行貨,巧花心思,細節用心,朝早瞬間滿座,小編決定下午茶先再試。

開張半年,室內裝潢佈置簡潔,陳設簡單,環境靜謐,令人放鬆,同時暗藏基督、Pepe同連登豬嘅蹤影。據悉,店名koinonia為希臘文「κοινωνία」嘅英文譯名,似乎店主係一個虔誠嘅基督徒,難怪陳設略有基督教感覺。

當中,最特別係店內盡頭有一個超有和風味道嘅座位,小小角落係一個有日本風格嘅包廂,疫情期間加添膠片分隔,顯得私隱度更重,榻榻米座位適合私人聚會圍爐吹水或拍拖談心。加上甫踏入店內,店員即為客人量度體溫同消毒雙手,店內員工連煮食員工通通有戴口罩,所以可以食得放心。

牛油果松露蛋沙律醬牛角包係小編推介,下午茶跟餐$39,上枱時牛角包有陣陣牛油香,新鮮烘焗出嚟嘅牛角包層層酥脆,麵包溫暖軟熟,餡料幾厚,牛油果好creamy,蛋沙律有啖啖黑松露香,牛油果同蛋沙律都偏軟,同香脆牛角包形成對比,略嫌牛角包份量比較細。

卡邦尼意粉 $58 一碗份量亦唔算多,比較適合女仔享用,兩個人去嘅話,男士可能要叫多樣輕食。Carbonara向來係測試每間咖啡店嘅最佳食品之一,意粉幾爽彈,好掛汁,醬汁有黏稠感,加添洋蔥略帶清甜,煙肉微鹹,質感軟腍,加上香草點綴,賣相唔錯。

焦糖瑪琪朵抺茶鮮奶,一杯跟餐+$9,另一杯單點$36至$39,價錢平過連鎖咖啡店,Caramel Macchiato有濃香焦糖味,咖啡有拉花圖案,牛奶味平衡,奶泡打得唔錯,焦糖香甜唔會太搶,咖啡入口順滑。至於抺茶鮮奶亦好滑溜,抺茶味容易沉底,最好先攪勻。

甜品有蘋果金寶 $38,製作需時10mins,英式甜品Apple Crumble上枱熱辣辣,以蘋果為基底。焗起後,上層為牛油餅乾,好酥脆,有啖啖牛油香,下層則為金黃色蘋果軟心,好香甜同滑溜,有蘋果甜味,無蘋果酸味,暖笠笠有窩心感。

e.a.tips
(1)小編假日發現11至12點會比較多人,下晝3至4點會相對少人。
(2)可以預先訂位,避免等候,但座位只會Hold 5mins,逾時會馬上俾Walk in客人入座。
(3)有幸坐和式包廂內時,記得脫鞋,據日式風格係將鞋頭向出,再向內收,而女仔小手袋亦唔好亂放,正式係放自己背後,了解清楚後,等疫情過後再去日本就唔會失禮啦。

交通﹕多條巴士線如86A、89B可達沙田圍巴士總站落車,分別往返長沙灣、觀塘。

延伸閱讀﹕沙田河畔街坊糖水舖 平價飯後甜品

延伸閱讀﹕到訪沙田圍神秘古老大宅 有一座係一級歷史建築?

cafe koinonia

地址﹕ 沙田圓洲角路15-17號翠麗花園地下2號舖
營業時間﹕ 10:00 – 18:00
電話﹕ 9167 7955

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!