[sp_html5video category=”2787″]
香港近幾個月市道低迷，早前中環卻仍有過江龍拉麵店抵港，今次係來自日本大阪嘅 〇de▽鯛白湯らーめん，係一間以鯛魚湯拉麵店聞名嘅人氣店，中環店為香港分店，基本同日本店一樣，主打都係3款招牌拉麵，包括鯛魚白湯拉麵、鯛魚清湯拉麵、鯛魚沾麵。目前兩個人無得去旅行，小編經拉麵迷推介，決定一嚐濃厚魚湯嘅拉麵。
人氣拉麵店進駐香港，裝潢同樣貫徹日本風格，開放式廚房可以享受拉麵製作過程，可惜傍晚6點已經無晒最想試嘅鯛魚清湯拉麵，因為清湯味道較天然，魚味亦應該較重。至於今次食嘅白湯湯底，據悉湯底經8小時熬製，形成濃厚鯛白湯，魚香撲鼻，上枱一刻絕對要先打吓卡！
鯛魚白湯拉麵 $138 價錢偏貴，不過以質素嚟講的確有其價值，鮮甜魚湯配搭彈牙拉麵，拉麵偏幼身，入口煙韌，比較掛湯，配料仲有一塊薄切叉燒，質感滑嫩。湯底魚味極濃郁，味道鮮甜，碗底有唔少鯛魚肉碎，鯛魚白湯絕對會飲完一啖又一啖。
櫻木煙燻溏心蛋質感軟嫩滑溜，味道特別，蛋黃流心，邊緣煮得較熟，煙燻味令整體有別於平時嘅溏心蛋。
鯛魚沾麵 $148 上枱一刻極霸氣，縷縷輕煙由碗內散發，視覺效果一流！麵身呈波浪紋，感覺似刀削麵。沾麵湯底好濃稠，味道偏鹹，不過就欠缺魚味，比白湯魚味更輕。配料有叉燒粒、筍，叉燒較少，筍入口幾爽甜。食完沾麵，沾汁可再加湯，湯底無咁鹹，略有鮮甜味，可以一飲而盡。
| e.a.tips （1）18:30後基本上已有人排隊，拍拖去要避開排隊就一定要18:30到達，可則至少要排隊30分鐘至1小時。(情況適用於非疫情間限制堂食日子) （2）先付款，後入座，採用touch screen點餐，只收電子貨幣，唔收cash。 |
○de▽ 鯛白湯らーめん
| 地址﹕ | 中環鴨巴甸街13號地舖 |
| 營業時間﹕ | 每日12:00起至150碗售罄為止；星期日全日休息 |
| 電話﹕ | 2346 3889 |
在〈大阪過江龍人氣拉麵店抵港 全港獨有鯛魚湯〉中有 11 則留言
留言功能已關閉。