Sushiro壽司郎

樂富店9月尾開幕! 回顧4間Sushiro壽司郎限定推介 醒你3招輕鬆訂位攻略



Sushiro由佐敦開到黃埔、荔枝角、黃大仙,最近有消息指樂富分店亦將於9月底開幕,每間日日大排長龍,用App Book位都要一眼關七。小編食勻4間壽司郎,試過每間嘅限定款式,可以推介一下,同時Book位Book咗幾次,難度愈來愈高,即管分享吓壽司郎幾個Book位小技巧,等大家唔使虛秏等候時間啦!

今次第五間分店將會登陸樂富,9月25號就會正式開幕,現時已經見到樂富廣場分店外有白色圍板,到時又可以食到人氣壽司同創新壽司款,仲有香港限定同優惠壽司,試業至10月1號,絕對要密切留意!

Like Facebook 緊貼最新資訊,一個Like一個鼓勵,支持原創文章,向Content Farm說不。】

(1)佐敦分店

Sushiro壽司郎係日本人氣No.1 迴轉壽司,佐敦店甫登陸香港已經大排長龍,高質壽司價錢激抵,大大件壽司最平嘅紅色碟都只係賣$12/2件,其次銀色碟$17/2件、金色碟$22/2件、黑色碟$27/件等,比起元氣壽司或板長壽司抵得多,價錢雖平,但又唔會好似明將壽司咁劣食。

除咗超過100款壽司,仲有炸物、熟食、甜品,有傳統壽司,亦有限定款創作壽司同香港限定款壽司,喺輸送帶隨便攞一碟壽司都已經好美味,魚生鮮甜,壽司飯就算蘸埋豉油都唔會散。仲有好多平時好少食到嘅crossover壽司,款款都好驚喜。當中,藍鰭吞拿魚絕對無得輸,而蝦3味有3款唔同蝦,都只係計$17,平時1隻牡丹蝦平均都差唔多價。

如果撳日文版菜單,真係有日本食壽司嘅感覺,疫情期間無得起日本旅行,唯有食住日本壽司止吓癮先啦。兩個人食咗10幾碟連加一都只係$250左右,但好有放題感覺,食到飽之餘,唔係食垃圾落肚,真係值得Encore!

(2)黃埔分店

而黃埔店同佐敦店基本上無太大分別,不過室內明顯比佐敦店細,熱食可以試吓蜆肉麵豉湯、魚翅羹茶碗蒸、厚切燒鯖魚,壽司有牛油果迷必食嘅三文魚牛油果卷,仲有日本頂級池魚壽司、原條海鰻壽司、日本產魚翅壽司,甜品有巴斯克烤芝士蛋糕。

(3)荔枝角分店

第三間係荔枝角店,同黃埔店大小差唔多,多咗每月推介嘅期間限定,值得食嘅有特禮長鰭吞拿魚壽司、由深海紅蟹同松葉蟹合併嘅特盛蟹雙味壽司、雪花和牛雙味壽司等。而甜品仲有當時分店新推出、士多啤梨奶味卡達拉娜同由咖啡同牛奶口味組成嘅雙層卡達拉娜,味道偏甜,入口比較黏口,有士多啤梨味,但甜味蓋過蛋糕味。

(4)黃大仙分店

至於第四間分店則位處黃大仙翔盈里,當時新推出嘅期間限定比上一間分店更多,而且更廣泛,包括羅勒忌廉芝士生火腿壽司、日本產極上蒜味生火腿壽司、極上大吞拿魚腩壽司、青森縣產炸帆立貝伴他他醬壽司、極大北海道產帆立貝壽司、北海道產粒鰈壽司、昆布馬頭鯛、油甘魚天身等,亦有好少見嘅特大虎蝦天婦羅卷。而甜品除咗有奶茶味卡達拉娜,仲有開心果味意大利芝士餅,甜度控制得相對較好,芝士餅內更有粒粒開心果,幾有層次。

E.A.Tips﹕

(1)排隊隨時要等至少30分鐘,甚至1小時或以上,兩個人去食等同虛秏2小時,如果下載壽司郎App後登記成為會員,Book位就比較方便,只需預約返邊間分店,日期同人數,去到現場報到後嗰15mins內都會有位。不過疫情期間曾一度取消預約,但2020年9月18日已經恢復手機預約。(iOSandroid

(2)好似以前追星買演唱會飛咁,需要朝早Mon實壽司郎App,而新一日登記開放時間為該店開業時間,通常3秒內已經無位,所以基本上等同唔容許自行選擇喜好時段,只能唔理咩時段見有就即按BOOKING。

(3)WALK-IN排隊拎完飛可以透過官方YOUTUBE了解最新叫號情況,如果想WALK-IN,最好揀10點開門時候,而黃大仙店會比其他分店少人。

佐敦店 連結:https://youtu.be/6l9GwJ0J5xs

黃埔店 連結:https://youtu.be/j61jQqY6ZN0

荔枝角店 連結:https://youtu.be/hELBvxGsbVE

黃大仙店 連結:https://youtu.be/gkbPXjGkf7o

Sushiro 壽司郎 スシロー

佐敦分店

佐敦彌敦道348號彌敦坊UG樓
11:00 – 23:00*截單時間: 22:30
2388 7887

紅磡分店

紅磡黃埔天地享膳坊(第4期)地下G10號舖
10:30 – 22:30*截單時間: 22:00
2669 8317

荔枝角分店

長沙灣長沙灣道680號麗新商業中心地下G38號舖
10:30 – 22:30*截單時間:22:00
2688 7833

黃大仙分店

黃大仙龍翔道110號豪苑G3樓翔盈里5號舖
11:00 – 23:00*截單時間:22:30
6139 5051

樂富分店

香港九龍聯合道198號樂富廣場UG1樓L109號舖
10:30 – 22:30*截單時間:22:00 (試業時間﹕11:30 – 21:00*截單時間:20:30)

最後更新日期﹕2020年9月18日

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈樂富店9月尾開幕! 回顧4間Sushiro壽司郎限定推介 醒你3招輕鬆訂位攻略〉中有 1 則留言

留言功能已關閉。