神秘居酒屋係鄉村食堂？日系屏風變隔板坑口村隱居小隱隱於野

今時今日，好多餐廳明明位處市區，都被稱為隱世，令大家連隱世嘅定義係乜都搞得唔清唔楚。今次發現坑口村呢間居酒屋隱居，的確有人用隱世嚟形容，但小編唔會稱為隱世，只認為係一間有神秘感嘅隱藏鄉村食堂。

隱居呢間日式居酒屋，英文以Yin At Home命名，有幾分親民感覺，招牌菜式有串燒、牛湯泡飯、蠔燒飯團、綜合海鮮丼等，選擇唔算少，仲有清酒提供，拍拖食飯絕對唔失禮。雖然隱藏於坑口村村屋內，但都係一間幾抵食嘅日本菜。門口至室內裝潢簡約，採用木門同掛有日式紅燈籠，室內燈光偏暗，既有吧枱區，亦有酒櫃裝飾，座位基本唔太多，大概可容納廿人，的確有少少似日式居酒屋。

居酒屋內最特別之處係以屏風取代一般餐廳使用嘅普通白色隔板，疫情期間每每去餐廳，只會睇到一面面唔美觀嘅白色隔板，呢間就以真日式屏風分隔座位，令去唔到旅行嘅朋友都可以感受吓幾分日式居酒屋感覺，真日式屏風令美觀程度倍增，絕對可以打卡！

唔少人都會晚餐先食，但隱居嘅午餐亦不俗，由最平$68至最貴$138，兩個人可控制於$150內埋單。主食丼飯配搭以刺身、燒物為主，套餐有前菜小食或沙律，再加上湯或汽水，價錢合理，比較實惠，不過小編後來發現應該俾少咗一份前菜。當日小食係蝦春卷，餡料有鹹香，沙律醬配搭適合，但春卷皮唔脆，反而麵豉蝦湯幾有水準，蝦味濃郁，並非得鹹味，有鮮甜味，入口暖笠笠。

醋飯粒粒分明，壽司醋調味上唔算好酸，珍珠米亦有添加芝麻點綴。燒封門牛丼 $68 表面舖有一塊又一塊牛肉，一碗大概5塊，色澤唔會太深，質感軟軟嫩嫩，有輕微燒炙感，牛肉介乎生同熟之間，燒汁調味唔錯，可惜份量唔足以撈飯。

牛油果雞扒溫泉玉子丼 $78 以雞扒、牛油果粒配溫泉蛋、玉子燒，雞扒連醬汁有啲黏稠感，鹹中略帶微甜味，似凍肉舖醃製雞肉，不過牛油果粒粒就好新鮮，溫泉蛋同玉子燒充滿蛋香味，撈飯一流。

E.A.Tips﹕
（1）餐廳抗疫期間有外賣供應，凡係將軍澳或清水灣區滿$400即免運費，西貢區只需加$30，外賣自取更有9折優惠。
（2）最好先打電話預訂座位，當日見到好多枱都被留座，Walk in唔一定會有位。
（3）可乘搭小巴路線11A、11M、12A、12等直達坑口村；或由坑口巴士站步行去約需15至20分鐘，經東港城、TKO Gateway，再穿過厚德村、裕明苑，過隧道經富寧花園，即到達坑口村，由7-11便利店同坑口村鄉公所中間小路入去就見到；揸車去亦可喺出面停車，比較方便。
（4）午餐時間只限11:00至15:00，之後就要等18:00晚市，網上有指係深宵食堂營業到凌晨，但事實上目前只營業到23:00。
（5）午餐價錢無加一，丼飯由$68至$138任擇，另可自己添加壽司等。

延伸閱讀﹕【黃店巡禮】將軍澳4間隱藏小店午餐最平50蚊埋單

延伸閱讀﹕隱藏科技大學旁白水碗沙灘處處影相位