Second Draft

大坑酒吧獨特Fusion菜 茶記美食上大枱?



[sp_html5video category=”3629″]

銅鑼灣大坑小區聚集唔少驚喜美食,隱藏唔少良心店,酒吧餐廳向來俾人感覺以西餐為主,但當中有一間酒吧餐廳竟然將茶記美食重新包裝成Fusion菜?

呢間酒吧Second Draft位處銅鑼灣道同蓮花宮西街交界,翻查資料,Second Draft係少爺啤酒廠旗下一間酒吧,以開業逾一年,以超多種原桶手工啤酒為主打,酒迷應該會好興奮。不過人人都講啤酒,唔通我哋又講啤酒咩,今次同幾個朋友搵個地方傾吓偈,發覺現場燈光柔和,偏暗,氣氛不俗,室內裝潢以復古元素設計,牆身印有舊式塗鴉字句,包括「嚴禁吸煙」等標語。吧枱同牆身都以藍、綠色為主,略帶英倫風格,狀甚型格,有啲似Crossover 50、60年代嘅傳統冰室,大概係拍拖情侶談心好地方。

食物既有平民美食,亦有高檔食材,不過見到茶記美食變成Fusion菜,絕對令人好奇,原來轉一轉款,中式煮法嘅平民美食,都可以喺西式酒吧上枱。

一款好茶記Feel嘅係啫啫雞翼煲$138,包含三黃雞翼、自家水牛醬、藍芝士、唐芹,將Buffalo Wings同啫啫雞煲二合為一,雞翼係單骨雞翼,調味料好入味,味道偏辣。上枱時,煲內發出嗞嗞聲,的確有平時港式啫啫雞煲嘅風味,香口惹味。

另一款係咖央西多$78,有椰子吉士、柚子皮、斑蘭牛油、椰糖漿,將馬拉嘅Kaya同French Toast融合,以港式西多士做法炮製,咖央再配搭花生醬,層次豐富,好重椰香味,不過略嫌太甜膩。

重有招牌嘅大坑薯條$78,份量唔少,係熱辣辣上枱,包含有孜然、高菜、乾椒,調味豐富,味道偏鹹,比較重口味,但係好啱佐酒嘅小食。薯條幼身,有微微辣椒辛香味,入口脆卜卜,內裏算幾綿軟,夠晒惹味,略帶微辣,配上一小兜貌似沙律醬同蛋黃醬嘅醬料,幾開胃,唔太油膩。雖然好多人大讚,亦係招牌菜,不過小編唔太鍾意薯條加入過多孜然粉,味道過重,蓋過薯香味。

重有一碟賽螃蟹麵$298,將粵菜變西菜,又係中西合璧,以上海麵取代蛋白,配搭花蟹蟹肉撈勻,頂端有個蟹蓋裝飾,好啱兩個人呃Like!麵底質感一般,軟硬度不過不失,蟹蓋底有一隻蛋黃,將半熟蛋黃、蟹肉同麵條撈勻,最特別係配有一小碟浙醋,為賽螃蟹麵提鮮,蘸少少浙醋後,蟹肉鮮甜中帶浙醋酸味,有幾分似食小籠包,比起幾款小食,麵比較無咁鹹。


E.A.Tips﹕

(1)可用餐2hours,最好預先訂座,因為Walk -in未必有位,現場人數幾多吓,唔Book位有機會等好耐,Weekend比較多人。
(2)位置喺維多利亞公園對上小路,直行5至10分鐘即達。
(3)每日有唔同優惠,星期五六日免加一,星期一至四各有啤酒小食優惠。
(4)以上菜式為3至4個人嘅份量,情侶兩個人去可以叫少個小食。


延伸閱讀﹕銅鑼灣全新蕃茄濃湯麵 秘製日式冷麵清新消暑

延伸閱讀﹕15分鐘直上寶馬山紅香爐峰 無遮擋望維港靚景

Second Draft

大坑銅鑼灣道98號地舖
星期一至五 16:00 – 00:00;星期六至日 12:00 – 00:00
2656 0232

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!