元荃古道石龍拱水泥滑梯+荃灣蓮花山公立學校遺址

元荃古道石龍拱段環瞰青荃 廢校水泥滑梯探秘打卡

[sig_post_pv label=””] 個人瀏覽過



甫到達秋季,又係行山季節,但早排好多人趁疫情緩和即報復式出街,上山往往人頭湧湧,不妨行少少秘道減少遇上人群啦!即使係大眾都知道嘅元荃古道,都可以搵到比較少人行嘅路段兼影相位,最啱兩個人周末拍拖輕鬆行一行。

Like Facebook 緊貼最新資訊,一個Like一個鼓勵,支持原創文章,向Content Farm說不。】

元荃古道路段頗長,連接荃灣至元朗,要行晒需要幾個鐘,而且重要一定體力,今次只挑選當中石龍拱路段,從荃灣港安醫院對面上山,除咗初段爆上斜需要體力,待30分鐘後擊倒長長天梯則會比較輕鬆。到達大欖涌引水道後,一邊係去下花山,只要沿元荃古道郊遊徑繼續向上行就得。

沿元荃古道一直行到大欖郊野公園石龍拱涼亭,約需另外30至45分鐘,但路段算比初段平坦,沿路可以環瞰荃灣一帶、九龍市景,涼亭位置可近距離望青衣一帶、青馬大橋景,甚至眺望馬灣、大帽山、藍巴勒海峽,景觀極遼闊,更可望到飛機經過,去唔到旅行都算低成本地望梅止渴啦。

到達石龍拱涼亭後,元荃古道右邊可到達高點,沿山路行可以去到三角測量站、標高柱,但路段較崎嶇,都係留返專業山友行啦。最安全都係繼續沿元荃古道向田夫仔方向直行,行幾百米之後,大概10至15分鐘,會見到寫住蓮花山嘅路牌,右轉直行約5分鐘,就會見到隱藏喺山內、超特別嘅水泥滑梯,背後就係蓮花山公立學校,學校旁邊有已經倒塌嘅籃球架同變成草屋嘅圖書室,似足走入一道時光隧道。

蓮花山公立學校遺址已經係缺少屋頂嘅舊校舍,似乎天花早就塌陷,只淨低石造黑板同頂頭刻有「蓮花山公立學校」,人去樓空,雜物遍地,出面洗手間亦被草叢遮蔽,圖書室連名都睇唔到,滿佈葉藤,已經變成一間草屋,整個校舍被草叢、林木重重包圍。

最特別係圖書室,植物沿石牆而生,恍惚變成牆紙一樣,變成一面又一面由攀藤植物形成嘅草牆,天然美感爆燈!

一座簡潔嘅水泥滑梯擱於學校遺址旁邊,四周都係草叢,滑梯簡約中有獨特風格,狀甚型格,滑梯樓梯無扶手,以水泥造嘅滑梯已經比較罕見,滑梯原先以純白為主調,日久失修後,顏色逐漸褪去,加上雜草叢生,帶有殘舊感。

事實上,蓮花山公立學校係一所村校,由50年代興建,到80年代停辦,及後被廢棄。因村落交通不便,小朋友要行400幾500米高嘅山峰先可以返學,所以最終變成廢校,一直以來都係唔少山友嘅打卡點。

延伸閱讀﹕慢活歎Brunch 南豐紗廠小店撐本地品牌手沖咖啡

延伸閱讀﹕荃灣隱世壁畫村 光板田村七色階梯打卡

E.A.Tips﹕

  1. 可於荃灣愉景新城經巴士總站,向荃灣港安醫院方向行,行至荃景圍後,於柴灣角遊樂場旁邊元荃古道入口上山,大概行15至25mins。

  2. 亦可乘搭乘搭巴士路線30, 30X, 39A, 39M, 934A, N39, A38號到荃灣港安醫院附近,或小巴路線95, 95M號由荃灣如心廣場/千色匯/愉景新城等上車點直達荃景圍,或小巴路線96號由荃灣街市上車到荃德花園落車。

  3. 記得攜帶充足裝備,接連向上行約500米,必須有足夠食水、乾糧。

  4. 元荃古道荃灣起點初段樓梯會比較多,大概行足30至45分鐘,需要一定體力,謹記要量力而為。

  5. 石龍拱部份連接元荃古道路段無圍欄,沙石較多,以石砌路,比較危險,需要小心行走,而且無遮蔭,要有防曬用品。其他路段都屬簡單易行山徑,而且大部份都係石屎路,上陡峭樓梯同一段斜路後,基本都偏向平坦而行。

  6. 蓮花山路段有幾分探險感,不過超多樹叢,要小心有蚊蟲同蜜蜂,要帶備防蚊用品。

  7. 記得愛護環境,自己垃圾自己帶走。

  8. 石龍拱路段傍晚入黑時會特別多牛隻同狗隻,狗吠聲亦甚多,要小心個人安全,唔好走近村屋。尤其黑色嘅狗隻,無論狗隻有幾多隻腳,都要謹記唔好同對方有眼神接觸,要緩慢行走離開現場,唔好對牛隻同狗隻有任何挑釁行為。

  9. 蓮花山公立學校遺址結構可能有損,探秘時要注意危險度,而旁邊水泥滑梯亦日久失修,未知有無問題,始終承重力有限,上樓梯亦有一定危險,小朋友要由大人陪同,而超過100磅嘅朋友就唔好攀爬啦。而滑梯亦好骯髒,最好都係唔好嘗試瀡滑梯啦!

  10. 想輕鬆遊嘅話可以只行荃灣至蓮花山公立學校,然後原路折返,僅約3km,全段腳程來回約2小時可以完成。否則可以經白石橋行去荃錦公路方向落山,所需時間長少少。

  11. 想更有冒險感,可以前一個山路入口進入蓮花山公立學校,到處都係草叢,不過有墓地,需要留意。行到有樓梯位置,直上就會見到蓮花山公立學校。但呢條路線的確有啲冒險,唔太建議行。

  12. (攝後發現) 記得唔好隨地掉垃圾,自己垃圾自己帶走,唔好以為橙皮可以大自然分解,事實係自然分解唔係咁簡單。

蓮花山公立學校

大欖
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈元荃古道石龍拱段環瞰青荃 廢校水泥滑梯探秘打卡〉中有 1 則留言

留言功能已關閉。