[sig_post_pv label=””] 個人瀏覽過
跳蚤市場源自歐美地攤巿場，場內大多係平貨、舊貨，而本地都有一個擺放逾20年嘅海景跳蚤市場，鄰近屯門黃金海岸，叫樂安排小欖跳蚤市場，絕對係城市角落，最啱兩個人拍拖去掃平貨啦！
位處屯門嘅樂安排小欖跳蚤市場（LokOnPai Siu Lam Flea Market），離屯門黃金海岸不遠，為樂安排海水化淡廠舊址，靠近香港石油化學有限公司樂安排碼頭及儲油庫，係第一個海景跳蚤市場。
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
跳蚤市場本來有個大型燒烤場，但隨燒烤場消失，加上被港鐵徵用部份土地作小欖躉船轉運站，令跳蚤市場可用面積大減，當年近百檔主加入反收地抗爭，目前只淨返僅餘幾個攤位同小食亭。
沿小路進入跳蚤市場，會經過一個廢墟地，附近有片場、拖運公司，沿路會一直見到塗鴉作品。
樂安排小欖跳蚤市場帶有幾分殘舊感，跳蚤市場內嘅攤檔大多售賣廠房平貨、舊貨或次貨，有廚房用品、烘焙用品、古董、傢俬、玩具、衣物鞋履等，都以低價出售。但事實上，以各款煮食廚具為例，貨品瑕疵唔太明顯，甚至難以望到，基本都同出面商舖差唔多，但價錢就平好多。
延伸閱讀﹕【聖誕好去處2020】新界3個市集尋寶為家居裝扮！ 一個限時開放 一個偏僻兼鮮為人知
聖誕節臨近，跳蚤市場內亦有唔少聖誕裝飾品，相片坊間聖誕裝飾，款款價錢相宜，不妨以最低價錢為家中打扮一番啦！
跳蚤市場依山臨海，附近係傳統豪宅，背後其實重有一個神秘碼頭，可眺望青馬大橋、青山灣、青山灣，亦可望醉人日落景，甚至可望飛機升降。
E.A.Tips﹕
（1）乘搭巴士路線53 , 252 , 52X , 61A , 61M , A33, 城巴962到達愛琴灣(THE AEGEAN)路口落車，折返轉入小路，沿青發街步行進入，沿路有指示牌指示去跳蚤市場，腳程約10分鐘。
（2）自駕可以從愛琴灣轉入青發街，沿路有指示牌指示去跳蚤市場，停車場本來全日收費$5，但目前大概已經變成任泊。
（3）乘搭綠色小巴路線140M, 141亦可到達小欖新村、愛琴灣、青發街，都可以步行直達跳蚤市場。
（4）小路進入跳蚤市場時，不時會有大貨車經過，需要特別注意安全。
（5）留意跳蚤市場只有星期六、日、公眾假期營業，免費入場，但平日係無嘢睇。
樂安排小欖跳蚤市場（LokOnPai Siu Lam Flea Market）
小欖青發街59區號 
星期一至五休息、星期六日及公眾假期 11:00–19:00 
2440 1991（黎先生）
在〈【假日好去處】屯門海景跳蚤市場掃平貨 小欖神秘碼頭睇日落〉中有 2 則留言
留言功能已關閉。