尖沙嘴K11 Afterfloom 花香下午茶 台式 x 法式

尖沙嘴K11 Afterfloom花香下午茶10:4比例失衡? 台式鹹點超飽肚 法式卡通蛋白餅萌爆!



尖沙嘴K11 Artmall內嘅良心咖啡店花香Floom Floom於今年5月開業,係女生同閨蜜聚會好地方之一,為同區鳥語Floom Floom姊妹店,店內有唔少IG-able小角落,包括少女感滿滿嘅心形打卡牆、粉色霓虹燈字句等,最近連呢間咖啡店都加入Afternoon Tea戰團,拍拖或Girls’ Talk邊食邊傾都好適合!

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

雖然High Tea唔等如Afternoon Tea,Low Tea先係傳統英式下午茶嘅貴婦式Afternoon Tea,Low代表坐於矮過飯枱嘅梳化或茶几,而High就代表高枱櫈,不過我哋香港打工仔都係勞動階層嚟,食返個飽肚High Tea先係面對現實。

餐廳本來主打Fusion菜,食物帶日式、台式、港式風格,以輕食、小食、甜品為較受歡迎菜式,而飲品亦以色彩豐富為賣點,帶韓式風格,食物、飲品都屬於相機食先嘅打卡-able款式。今次Afterfloom Tea Set於12月推出,分矜貴型$438/2同經濟型$398/2,食物上完全一樣,兩個人食幾飽肚,甜品則略帶童真感,前者於特調飲品上特別花心思加上公仔,後者則為一般咖啡或梳打,顏色上唔算太大分別。

下午茶層架以單向盒型設計,分3層,有別於傳統三層架,擺位亦有分別,食材唔算名貴,價錢合理,都不失為謀殺菲林之選。Tea Set有10款鹹點、4款甜品,反而無傳統鬆餅,比例上有少少失衡,但突破傳統風格都係可以支持嘅,貌似台式、港式鹹點配法式甜品,同樣賣精緻可愛款式。

鹹點上有創意,有好幾款都充滿台式風格,以台灣小食置於下午茶層架中,比如香口厚身嘅迷你脆脆排骨漢堡、入口奇怪又偏油嘅中空QQ地瓜球、多鹵肉少桃膠似雞蛋嘅鵪鶉蛋桃膠鹵肉撻、有驚喜嘅明太子波波飯團、唔覺有花雕味嘅花雕蝦沙律杯。其他鹹點有有別傳統嘅牛油果蟹肉鬆餅無花果鵝肝醬馬卡龍焗芝士忌廉千層薯煙三文魚白松露芝士迷你鬆餅迷你芝士洋蔥煙肉撻。10款當中,有近一半都屬碳水化合物或五穀類飽肚款式,波波飯團幾有特別,炸波波內藏飯粒,飯粒又包含啖啖芝麻香、松露香;千層薯幾大舊,但就比較失望,滿口冷冰冰,cream cheese似剛從雪櫃取出,有雪味,唔夠薯香。

甜品就以法式為主,更需要技巧,相對鹹點有落差,大概明白何解鹹點會比甜品多逾一倍。層架頂層以花香特色蛋白餅為重心,寫明Random Shape,大概未必每枱一樣,記者枱面蛋白餅係以貓形設計,貓咪卡通萌樣令人唔捨得放入口!蛋白餅入口唔算甜,微脆感有幾分似童年食過嘅水泡餅。至於其他甜品就有稍缺芝士香嘅草莓芝士餅、屬理想與現實造型嘅無脆冧酒可麗露、4款口味嘅迷你閃電泡芙,包含有士多啤梨、檸檬、咖啡、椰子,4款都甜膩到不得了,每舊未咬到一半已經可以放棄。

$398包嘢飲,$438先有特色飲品,經濟型可揀咖啡或梳打,藍花梳打即蝶豆花梳打,花香梳打即桂花梳打,只能講後者相對比較清香,甜味無咁重。

延伸閱讀﹕邊2款甜品壓軸? Palco Ristorante尖沙嘴重開 意法下午茶矜貴鹹點夠出色

延伸閱讀﹕《暖男爸爸》取景地 古蹟地有來頭 實試ODEA法式庭園果香下午茶

延伸閱讀﹕Shhh!尖沙嘴全新乾花系Café 爆汁手打牛漢堡 周末放空歎咖啡兼玩工作坊

E.A.Tips﹕

(1)下午茶供應時間為星期一至日 14:30 – 18:00,以兩個人計,$398包嘢飲,$438先有特色飲品。

(2)走入K11,直落地庫B2層,扶手電梯後方角落位置即達。

花香

尖沙嘴河內道18號K11購物藝術館B2樓201號舖
12:00 – 22:00
5500 6239

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!