[sig_post_pv label=””] 個人瀏覽過
葵芳唔一定得葵涌廣場有嘢食，最近有一間主打泰式海南雞飯嘅小店開業，擺明係後生仔主理，反正夜晚無得堂食，只能買外賣，不妨拍拖兩個人搵吓啲小店支持吓啦！
店內食物款式唔多，以泰式無骨海南雞、泰式小食為主，小食如泰式生菜包 $50、香葉肉碎 $40、泰式大蝦柚子沙律 $58，更有2人餐$168、4人餐$338，
驟眼睇，泰式無骨海南雞飯 $50 似足水門泰式海南雞飯專門店，無論飯盒造型本身，定雞飯內青瓜、蕃茄配菜同雞飯排列，第一個感覺係一個伏，最大分別係叫雞飯送咗碗泰式椰汁雞湯，雞湯單買就$48。打開飯盒，最先傳出嘅係雞湯香味，湯內有冬瓜、有椰香，飲落果然有雞湯味，敗筆之處僅於鹹味不均，鹹味沉於底部。
相比水門泰式海南雞飯專門店，海南雞叔叔嘅雞飯好得多，至少有油飯香，並非純白飯，飯量充足，飯粒唔會黏住一舊。雞件為雞髀肉、雞胸肉，雞肉滑嫩，大部份都熟透，但有少部分未熟透，而醬汁鹹辣適中，雞肉蘸上醬汁幾滋味，拍得住綠色牌匾水門雞飯。
延伸閱讀﹕【黃店懲罰祭】葵芳掃街另類選擇 葵涌廣場以外5間良心圈小店
E.A.Tips﹕
（1）位置於另一良心店吉壹野旁，由葵涌廣場2樓天橋行到底，沿盛芳街行，經過智芳街街市，向前行得幾間舖就會見到。
（2）小店暫時逢星期二休息，營業時間為中午12:30至22:00。
海南雞叔叔
葵芳盛芳街 
12:30 – 22:00 
2853 2566
