隱藏中環橫街窄巷 OL至愛健康越式三文治

越南菜當中，越南河Pho係其中受歡迎嘅菜式，但越南菜一般俾人印象都係比較多香料兼油膩，其實越南菜都可以好健康，例如越式法包、米紙卷，中環橫街窄巷內就有一間主打健康越南法包嘅良心店，叫包再揀配料，變成越式三文治，有食Subway嘅感覺，適合兩個人拍拖食簡餐，更適合一眾OL當Lunch。

身為前法國殖民地嘅越南，將法包變成越南法包，麵包變得無咁硬身，而且皮薄。據稱，店內嘅越式法包係每日鮮製烘焙，由藝人黃婉曼嘅麵包店RISE Boulangerie提供新鮮麵糰，到店後再烘焙，然後每次加入唔同配料，例如越南肝醬、醃菜。

Bánh mì Việt Nam即越式法包，店內有5種選擇，包括越式經典、叉燒滋味、沙嗲肉眼、香茅雞腿、素食之選香茅芫荽醃豆腐。其中一款揀咗嘅係Charred Chau Siu $65，中文即叉燒滋味﹕丹麥叉燒，醃製48小時，再加熱烤過，麵包內粒粒叉燒肉粒滲出烤味，幾香甜，好有肉感。麵包表皮脆口，但麵包內較傳統法包軟身，幾煙韌，無咁刮口，但仍酥脆可口，麵包塗有沙律醬、軟滑而鹹香味適中嘅越式肝醬，內夾有海量醃製蔬菜，如蘿蔔絲、青瓜、生菜、芫荽等，入口酸中帶甜，中和返肝醬鹹味同叉燒烤味，幾清爽。

另一款係Lemongrass Chicken $62，中文即香茅雞腿﹕香茅青檸美國雞腿，無油份醃製，比較輕盈，屬低卡路里之選，麵包內含雞肉絲、香茅，同樣有海量醃製蘿蔔絲、青瓜、生菜、芫荽等。雞肉比叉燒較有濕潤感，入口軟稔，而且無咁乾。一件麵包其實已經足夠一個人一日所需能量，但加$35有Rice Paper Roll 米紙卷，加$18可加1.5倍肉，加$35可加雙倍肉。

另外，加$20有越式咖啡，加$10有越式蓮花茶，淡淡綠茶香，茶味清新淡雅，甚甘香，相對咖啡，有種純潔嘅感覺，而且蓮花茶可養顏美容、舒緩神經，絕對係女士之選。

E.A.Tips﹕

（1）餐廳只有2個企位堂食，但目前僅接受Takeaway。
（2）買一件法包可以半價購買飲品。
（3）沿德輔道中步行，經過戲院里、昭隆街，即可到達利源東街，沿路步行近一半路程，會見到小店位處左手邊。
（4）麵包會用紙包住，方便手拿帶走。
（5）店內餐具都係環保物料。
（6）麵包可挑選有辣椒或無辣椒。

---