屯門紅橋城市角落 7款Burger配搭有新鮮感

[sig_post_pv label=”瀏覽：”]

相比屯門市中心，屯門紅橋方向有更多有水準嘅小店，上次介紹過一間由半島大廚炮製嘅台式牛肉麵同似足一秒穿越日本大阪嘅日式餐廳，今次就揀一間望落似典型Cafe嘅餐廳，原來小店除咗有普遍Cafe都有嘅意粉、意大利飯，主打係漢堡包。

餐廳室內環境舒適，座位幾多，夠闊落，少有10至20張枱，適合拍拖兩個人撐枱腳，甚至三五知己聚會。從價錢去睇，基本唔算好貴，屬一般文青咖啡店價錢。

既然以Burger為主，當然要揀一份漢堡包，目前有7款漢堡包，命名上有心思又有新意，除咗C.C.經典牛堡 $78，重有加入Parma Ham嘅胡迪、採用竹炭包嘅黑森林、有原隻軟殼蟹嘅橫行霸道、配上菠蘿包嘅咪走雞、加入匈牙利鵝肝嘅心肝寶貝、加入日式原條鰻魚嘅鰻鰻喜歡你。

當中，C.C.經典牛堡包含手打牛肉、車打芝士、煙肉、蕃茄、酸甜青瓜、沙律菜，漢堡包旁邊配有炸薯條，屬厚身薯條，感覺有幾分似鐵板上嘅薯條，炸得香口，份量適中，夠飽肚。整體夠厚，內餡包含手打牛肉炮製嘅漢堡扒，煎得幾香口，略嫌牛味唔夠重，加入其他配料後，層次豐富，最特別係有一般咖啡店或漢堡包小店都好少落嘅酸青瓜。值得欣賞嘅地方係漢堡包一刀切落去時，切口完整，唔會切到散晒，即使淑女都可以逐舊慢慢用叉放入口。

至於Lunch Set就有5款任揀，包括All Day Breakfast，最平嘅係蒜香菠菜煙三文魚意粉 $78。以蒜、菠菜炒意粉，意粉乾爽唔黏口，蒜香適中，菠菜雖可減低油膩感，不過似乎牛油份量都多，顯得仍然略油，煙三文魚捲成花朵形狀，份量唔少，點綴之餘亦足夠食用。

每份Lunch Set都可加一杯$20內嘅飲品，選擇比較少，都係咖啡或茶，或補差價叫其他飲品。一杯即磨咖啡，入口同平時自己以家用咖啡豆沖泡嘅味道差唔多，略有甘香、苦澀味，不過不失。

E.A.Tips﹕

(1)乘搭巴士路線46,46X,53,67M,67X, 258P,261,267X,A33X,K51 可到達景峰花園，沿樓梯步行落去青棉徑，直行到菁雋之前路口就會見到L形餐廳。

(2)餐廳收加一服務費，而每日最後落單時間為21:30。

(3)一份Lunch Set可加$48，會有餐湯、飲品、雪糕，適合想慢慢歎、慢慢坐嘅朋友。