沙田石門平價台灣麵套餐口水汁撈麵最啱嗜辣者

沙田石門京瑞廣場有唔少良心小店，呢間台灣菜就係其中之一，店內下午茶時間比午市少人，午市一般座位坐滿人，主打係麵，門口眼見餐牌有新品推介就試吓，啱拍拖兩個人平食午餐。

新品有蕃茄牛肉濃湯配撈麵$58，撈麵有日式、麻香醬、口水汁、薑蔥蒜4款任揀，雖然貌似想將蕃茄湯同撈麵放埋一齊食，但小編覺得兩者分開會比較恰當。蕃茄牛肉濃湯有海量牛肉切片，軟稔易入口，加入蕃茄粒、洋蔥粒等，有少量茄蓉感，蕃茄濃湯味道似蕃茄罐頭湯濃度。口水汁撈麵帶微辣味，醬汁辛辣度會愈食愈辣，不過屬可接受程度，辣中帶麻，麻中帶香，香辣味好醒胃。而主角麵條則粗幼適中，似上海麵，尚算爽口，有部份容易斷，未有黏住變成糊狀，麵條被口水汁帶出香口感覺。酥炸魷魚鬚 $28係其中一款小食，以呢個價錢嚟講，份量適中，味道不過不失，夠香口，不過似乎唔夠酥脆感。