【2021賞花地圖】中環紅棉路美利酒店打卡 4月百年古樹綻放粉嫩奪目節果決明

[sig_post_pv label=””] 個人瀏覽過

3月剛剛過去，櫻花已逐步凋謝，但唔代表「賞花地圖2021」就此結束，事實上春季賞花地圖並唔係只有櫻花一種花卉，其他靚花一樣值得拍拖兩個人賞花打卡。踏入4月，有一種媲美櫻花嬌艷嘅粉紅嫩白花朵綻放，位置於中環紅棉路，今年如往年一樣開花。

呢種令人驚艷嘅粉紅花朵叫節果決明，一株高大嘅節果決明樹矗立中環紅棉路美利酒店旁邊，比起被排隊打卡嘅美利酒店停車場斜路更值得影吓相。微風吹拂，紅蕾、白瓣、黃蕊自然飄落，意境夢幻，似足走入童話世界。

節果決明樹約高16米，約有2層樓高，樹冠覆蓋12米，近望可見歷盡滄桑，生長於中環商業區美利酒店旁，樹頂延伸一串串剛開花嘅粉嫩花枝，無數白色與粉紅色小花交織出鮮艷奪目嘅畫面。花朵盡開時極璀璨，縱橫伸展出密密麻麻嘅粉嫩花朵，長達1米，狀似繁星，非常壯觀！

節果決明樹原產自熱帶亞洲，一般於初夏開花，又叫粉花山扁豆，節果決明樹於2004年9月曾經被列為香港「古樹名木」，被評為係香港珍貴又稀有嘅品種，有文化、歷史、重要紀念價值。屹立百年，呢棵百年大樹原產自夏威夷，因美利大廈活化而被保留，都算係碩果僅存，而另一棵節果決明樹位於迪欣湖。中環呢棵節果決明樹嘅樹幹稍有傾斜，由兩條鋼筋支撐，以作保護，亦可加固承托，近睇可見樹身飽歷風霜。

E.A.Tips :

(1) 節果決明為珍稀古樹，唔好胡亂採摘同破壞。

(2) 由中環天星碼頭行至遮打花園，經行人天橋走，沿花園道上斜，即達美利大廈，由遮打花園至美利大廈只係10分鐘步程；或者於天星碼頭轉乘15C，到山頂纜車總站落車，對面就係美利大廈；乘搭電車則可於皇后像廣場落車，靠近HSBC，於路口上斜，見政府大樓後沿扶手電梯上行人天橋，過馬路就到達美利大廈；乘搭巴士路線104, 302, 6X, 780, 930A, 934, 985A, HR48亦可到達美利大廈；揸車去可以喺花園道路口入美利大廈。

(3) 賞花謹記保持安靜，進入公園要將垃圾丟棄垃圾桶內。

(4) 可於酒店大堂內或停車場平台外觀賞。

(5) 由香港公園穿過行人隧道，即可直接抵達美利酒店。