銅鑼灣28樓高空歎燕窩魚子主題High Tea

平時得閒鍾意同閨蜜兩個人歎吓High Tea吹吓水嘅小編，唔會因為拍拖而唔見朋友，今次又去試咗新一款下午茶啦，唔好以為High Tea一定係好貴，其實而家好平嘅價錢都可以食到睇落好靚嘅下午茶。

喺club@28試咗呢款tea set，小編通常揀啲抵食又唔貴，靚得嚟又飽肚嘅下午茶，今次有5款鹹點同6款甜品，仲有杯cocktail/floral tea任揀一款，閨蜜二話不說揀咗花茶，而小編想特別啲，鍾意strawberry，但唔飲得酒，就問問waitress呢款cocktail特飲可否唔要酒精？

雖然對方提醒會唔同味，好彩都可以唔落酒精，望隔離枱嗰杯strawberry cocktail同呢杯睇落其實無太大分別，呢杯特飲飲落似strawberry果汁沙冰，鍾意strawberry嘅小編表示超鍾意！

鹹點有5款﹕
香煎慢煮雞肉紅椰菜沙律撻﹕撻內釀咗雞肉碎同椰菜沙律，微酸幾開胃；
蘋果三文魚子紫菜蝦片﹕蝦片上放咗蘋果，蘋果撈埋三文魚子帶上少少鹹味，紫菜就有點綴作用；
小龍蝦飛魚子忌廉芝士牛角包﹕牛角包入面釀咗好多餡料，好豐富，蝦肉魚子鮮味，忌廉芝士香濃惹味；
鴨肝批燕窩紅桑子脆脆﹕放餅乾上面嘅鴨肝，味道香濃，入口軟滑，餅乾需同時入口，可解去鴨肝膩感；
煙三文魚酸忌廉魚子醬﹕將魚子醬放上三文魚上，感覺好矜貴。

甜品有6款﹕
豆腐奶凍檸檬魚子﹕豆腐味奶凍清清哋都OK，檸檬魚子就唔太食得出；
蜜糖乳酪慕絲﹕比較中伏嘅一款，慕絲有啲難食，同蜜糖乳酪好似唔太夾；
燕窩葡撻﹕最穩陣嘅一款甜品，唔算好甜，加入一坨燕窩感覺特別矜貴；
芝士餅配紅桑子果醬朱古力﹕小編唔食朱古力，只係食咗入面啲餡，芝士餅好香濃，紅桑子果醬酸酸甜甜好滋味；
燕窩法式栗子撻﹕撻內釀入栗子蓉，上面再舖有燕窩，感覺亦好矜費，栗子蓉磨得細膩幼滑，閨蜜唔太鍾意陣味，不過我就覺得栗子味幾唔錯；
洛神花凍梳乎厘﹕小編不嬲鍾意食梳乎厘，但今次梳乎厘係凍食，感覺無熱食咁滋味，梳乎厘都係熱辣辣焗完即食先食到嗰種鬆軟感，凍食口感軟綿綿，似食布甸奶凍之類。

GLYCEL 燕窩魚子醬煥膚下午茶
位置﹕香港銅鑼灣皇冠假日酒店Club@28
地址﹕銅鑼灣禮頓道8號香港銅鑼灣皇冠假日酒店28樓Club@28
供應日期﹕即日至2020年2月2日
供應時間﹕14:30 – 17:00
價錢﹕星期一至五$468/2位；星期六、日及公眾假期 $498/2位（另收加一服務費）
電話﹕3980 3300
*每位可獲贈一份GLYCEL燕窩及魚子肌膚護養產品