深水埗低調跑友部落結合跑緣 超健康「飛毛腿」醫肚兼學養生跑

[sig_post_pv label=””] 個人瀏覽過





深水埗於上年曾入選為外國雜誌《Time Out》公佈嘅2020年「全球 40 個最型格社區」排行榜三甲,社區內食物、生活、文化、藝術、社區精神等都備受表揚,事實上深水埗係一個歷史悠久小社區,大街小巷融合新舊文化,加上大多數為草根階層,連餐廳都一間比一間貼地。區內就有一間以跑步為題嘅餐廳,食物健康,深受一眾跑友歡迎,老闆為一個基督教牧師,將健康食物同跑步、信仰融合,又不時教客人養生跑,非常有意思。

位於深水埗荔枝角道嘅「跑緣」,英文名亦叫Runners’ Foods,以跑步為主題,2019年尾開設至今受到唔少跑友歡迎,而老闆黃牧師亦關心客人需要,店內可以一邊醫肚餓,一邊治療心靈,亦可得知跑步常識同四式養生跑方法。據悉,小店曾每個禮拜都派飯俾區內露宿者,甚至邀請其參與崇拜。

餐廳附近為著名景點雷生春,加上門口有跑手造型霓虹燈招牌,甚搶眼。室內分為兩個部份,前段為開放式廚房,有正對街道嘅落地玻璃座位,更有多個馬拉松跑手選手布、獎牌、獎杯,甚至跑步心得。推開玻璃門,會發現內裏暗藏乾坤,內有幾個座位,可以於一個神秘空間安靜地用餐,裝潢陳設以一堆堆充滿歷史價值嘅舊物堆砌而成,古董味極重,似足走入一部懷舊電影。

而菜式基本以健康、營養為主,大多為簡餐,以少鹽、少糖、少油為主,甚少煎炸。當中飛毛腿系列甚受歡迎,適合作跑步餐。飛毛腿無賀爾蒙雞下髀,可選香草蜜糖、香辣、黑椒黑芝麻口味,純兩隻雞下髀$45,配搭黃薑飯$83,而配搭意粉$80。以兩隻黑椒黑芝麻口味雞下髀配上黃薑飯,旁邊有淋上黑醋嘅沙律菜,份量唔少,幾開胃。



目前餐點以錫紙盤盛載,食物偏清淡,亦相信的確係無味精、防腐劑、添加劑,但又並非完全無味之食物。以無賀爾蒙、無激素而成本較高嘅雞髀為例,雞髀比較原汁原味,表皮稍薄,烤得香脆,只係稍為加上適量黑椒、黑芝麻調味,令整體更香口,而雞肉嫩滑而有肉汁,脂肪比較少,餐點更有沙律,包含羽衣甘藍、小蕃茄等,卡路里稍低,亦可吸收蛋白含量,夠晒均衡。至於黃薑飯就取代白飯,雖然色調黃澄澄,但黃薑味唔重,比較清淡,

季節限定港製嘅有機洛神花果茶、叫黃起柚子梳打、話梅桔仔冰新彊公平貿易雪菊茶都係比較特別嘅飲品,簡單一個紙杯盛載,暖笠笠,幾清香,清熱解渴。雪菊為菊花嘅一種,可以降血清甘油三脂、降膽固醇,有效降血脂,亦可養顏、抗菌、改善睡眠質素。


E.A.Tips﹕

(1) 由太子起步,腳程約10分鐘;而由深水埗起步,只係比太子起步多約2分鐘。

(2) 店內重視清潔,需佩戴口罩、量體溫,亦需要消毒雙手。

(3) 每人會獲分一個紙袋,可以先放口罩,但主要用途係食完嘢將廚餘等放入去,同時需要自己收拾餐具、垃圾。

(4) 逢星期二、四09:00至12:00有中醫義診,沖劑收費僅需$20。

(5) 滿$88會送紙包飲品,其餘一般比原價平近一半。

(6) 現時一般叫餐點可以$10換領3粒泡芙。

(7) 18:30至21:30可包場,低消為$2500,需俾一半訂金。

(8) 飛毛腿款款都係即叫即焗
製作需時25分鐘,需耐心等待。


跑緣

深水埗荔枝角道135號地舖
星期一全日休息;星期二至日 12:00 – 18:00
4611 1135

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈深水埗低調跑友部落結合跑緣 超健康「飛毛腿」醫肚兼學養生跑〉中有 2 則留言

留言功能已關閉。