離文武廟僅3分鐘！上環日系書店自成一角本土書海淹沒兩層獨立洋房

[sig_post_pv label=””] 個人瀏覽過

上環有一個神秘角落，身為本土文青情侶嘅你哋絕對不可不知，由文武廟步行3分鐘，即可以到達呢個上環後花園。表面貌似一座以黑白為主調嘅小型歐式獨立洋房，實際上係歡迎愛書之人嘅書店，係拍拖兩個人週末歇腳好去處。

英文以Mountzero Books命名嘅見山書店，需要穿過橫街窄巷小路先會見到，登山先可見書店，難怪叫見山書店，原來真係來自禪語典故「見山還是山」。書店躲藏於一個面向牆壁同崛頭路嘅L形角落，自成一角，以白色牆壁配上黑色窗框，相當型格。香港地寸金尺土，能夠有一個獨立空間已算幸運。

門口頂頭更寫有「Ideas are Bulletproof.」，係一句來自電影《V for Vendetta（V煞）》嘅經典對白，電影背景為未來嘅英國，以鬥士V反極權政府嘅故事為主軸，包括獨裁政府、官官相衛、監視等，意思大概係表達抗爭理念同批判性思考係不受攻擊同刀槍不入嘅。

踏入門口，地下一層即見到一本又一本嘅本土書籍整齊地擺放小書枱，書海風景一覽無遺，有新書亦有二手書，更有少量文青小物。室內樓高兩層，拾級而上，可以到達上層閣樓另一個空間，矮書櫃內擺放嘅書籍稍有分別，既有英文書、文藝作品，亦有實用書籍、雜誌，甚至另類作品，樓上更有一部非常有趣嘅免費扭蛋機。

從上層閱讀書籍，一邊可俯視小街上風景，採光自然，另一邊可望綠色景觀，樹影婆娑，節奏減慢，有幾分似日式書店。最特別嘅係書籍通通無包膠，每一本都可以放心閱讀，而窗邊有小書架、小書枱，佈局用心，既有唔少文具，亦有一本留言板筆記本，會發現唔少愛書之人都留低幾句留言。

而書店外有少量以木製枱櫈構成嘅戶外雅座，可以攞起本書感受閱讀文化同寧靜時刻，享用免費Reading Time，亦可以於Free Space打吓卡，恍如置身異國境地。另外，門口更放有寫下Free Books嘅免費書籍，可供取閱或帶走。

E.A.Tips :

(1) 可以上官方IG睇吓最新書籍等詳情，IG為mountzerobooks。

(2) 部份書籍可供售賣，部份則為非賣品，最好先問清楚店方。

(3) 只有門口寫有Free Books嘅書籍先可以自取，勿亂取其他書籍呀。

(4) 店內有提供少量飲料，需要俾錢，睇書期間可以問一問老細呢。

(5) 店內有洗手間，最好先詢問老細可否使用。