[sig_post_pv label=””] 個人瀏覽過
大角嘴居民注意！來自屯門嘅人氣生炸雞髀專門店「很得輝」，最近殺入市區，選址大角嘴開設分店，繼續售賣掃街首選嘅生炸雞髀，每隻即叫即炸，入口脆卜卜，極邪惡！更加可以自行加入多種調味粉，8款調味粉款款有特色，辛辣度少至5種可擇，最激一款「死神辣」你又試過未？
據知，小店命名以連鎖店「肯德基」為藍本，取其諧音，上年尾開業後受屯門區街坊歡迎，最近更於大角嘴設分店，繼續供應招牌生炸雞髀，最啱拍拖兩個人掃街。店內除咗生炸雞髀，更有滷水雞髀、沙薑雞髀；既有雞髀，亦有雞中翼可以選擇，同時有茶飲店必備嘅手搖茶飲配秘製雞髀，以水蜜桃紅茶$18為例，有果茶味，甜度唔高，只屬普通茶飲店水準。
皇牌生炸髀$32 以香脆生炸雞髀聞名，雞髀炸成金黃色，非常吸睛。記者實試時覺得小店嘅炸雞髀反而似KFC香辣脆炸雞髀嘅炸雞髀方式，不過小店雞皮、炸粉偏薄，麵包糠唔厚，稍有鬆化感，放入口聲音清脆俐落，隻隻脆卜卜，但無KFC咁油膩，雞肉嫩滑，適當油溫有效鎖緊肉汁，亦並非炸到變啡色嘅「老肉」炸雞髀。
整隻炸雞髀上手香噴噴，唔太乾身，放入口亦可口，全長約有5至6吋長，直徑就有約3吋長，上髀加下髀約有一隻手掌嘅大細，但就唔太厚肉，以雞髀整體水準嚟講，絕對係拍拖兩個人遊大角嘴嘅掃街首選！
調味粉當中有2款唔辣，包括「澳洲BBQ風味」、「海苔椒鹽」，另有6款唔同辛辣度嘅調味粉，「蜜糖芥末粉」、「麻辣椒鹽」、普通辣度嘅「純辣椒粉」、「香草辣」、麻中帶辣嘅「魔鬼辣」，而激辣嘅「死神辣」辣中帶香又香中有麻，絕對係愛辣之人必揀！嚐試6種辣度時，大可以學吓人氣旅遊節目《花姐ERROR遊》系列去日本鬥食辛辣拉麵或辛辣燒肉，同朋友一齊挑戰自己，睇吓大家食唔食到辣到爆燈嘅「死神辣」？
編輯Miss A表示唔想食辣，所以建議唔食辣之人可以揀兩款完全唔辣嘅「澳洲BBQ風味」、「海苔椒鹽」口味；而屬於愛辣人士嘅Mr E最高只敢挑戰「魔鬼辣」，入口有花椒味，似麻辣多過香辣味，辣感已經非常刺激，味蕾上充滿辣感，麻香味可令嘴唇麻痺，辣味餘韻甚強。
小編講吓嘢﹕
本台編輯為無人脈兼無平台幫手嘅人，無得試食兼無得打尖，同平常一樣只能以普通人身份出動，落單後等足25至30分鐘，兩隻脆炸雞髀先熱辣辣到手，再自行將調味粉直接灑於兩個油膩膩紙袋內。其實，小店雞髀比以炸雞髀聞名嘅三多炸髀更有水準，加上可以自行加入唔同口味嘅調味粉，新鮮感十足，可以係同路人擺脫非同路人嘅好選擇。唯獨將調味粉灑入紙袋時比較困難，調味粉難以均勻分佈雞髀上，以致調味粉有機會只集中於雞髀某一處位置。如果小店繼續主要提供外賣，最好考慮吓改變包裝，又或者容許客人自行攜帶食物盒，將雞髀平放於餐盒內，再灑上調味粉就會比較好，同時可以響應環保。
E.A.Tips﹕
(1) 大角嘴分店於近期先開業，位置靠近金堂閣。
(2) 唔想呆等嘅話，最好預先打電話落單，再外賣自取。
(3) 炸雞髀隻隻即叫即整，等候時間比較耐，網上部份平台或網民指需等10分鐘，事實上等待時間少至10分鐘、多至20至30分鐘嘅情況都會出現，視乎會唔會遇上滔滔不絕嘅人流。
(4) 8款調味粉可自由加入，但基本上一隻雞髀前後各放1款調味粉已經好足夠，太多反而味道會較混亂，2款已經足夠，無必要太貪心。
(5) 小店除咗炸雞髀，重有蘑菇飯、小食、茶飲可以選擇。
(6) 內有4款套餐，會送飲品；雞髀1隻加1款小食可加$10要果味飲品，否則飲品都係正價埋單。
(7) 餐具、飲管皆於右邊位置，為自助形式，需要自取，所以奉勸大家等候時盡量避免企喺右邊自私傾偈，會阻礙他人。
(8) 小店唔收Wechat Pay、支那寶，只收Cash、Payme。
很得輝
大角嘴鐵樹街19號金堂閣地下18號舖 
12:00 – 21:30 
電6797 6248
很得輝雞髀專門店
屯門仁愛堂街50號金滿閣地下C2號舖 12:30 – 02:00 9194 8386
在〈堪稱本土版KFC！ 屯門人氣炸雞髀店殺入大角嘴 即叫即炸皮脆肉嫩 8種調味6種辣度任你揀〉中有 2 則留言
留言功能已關閉。