下長沙海灘手工Pizza店Lantana 意式薄批有芝士拉絲

[sig_post_pv label=””] 個人瀏覽過

由東涌去昂坪，中途會經過一個叫下長沙村嘅地方，位置偏僻，比較少遊客到達，連本地人都少之又少。大多數都係去沙灘遊玩，而大部份都係村民或外籍人士，感覺有如到達外國嘅沙灘，而沙灘旁邊亦有幾間臨海餐廳，其中一間價錢比較相宜，菜式以Pizza為主，適合拍拖兩個人週末去Chill吓。

餐廳位於下長沙海灘旁邊，完全同沙灘相連，菜式以手工Pizza、Salad、Pasta為主，亦有Blue Mussels、Fish and Chips等，都係外籍人士喜愛嘅菜式，更有酒精飲品。呢間都可以算係真正嘅隱世小店，的確遠離市區，人流甚少，充滿異國風情，狀似世外桃源，店內不時有海風吹入，清風送爽，甚愜意。

沙律當中有Parisian Salad $168，多為歐洲材料，包含Mixed Salad、火腿、埃文達起司 (Emmental cheese)、雙孢蘑菇 (Agaricus bisporus)、核桃、熟雞蛋，沙律汁底好醒胃，好清新，材料上比坊間沙律稍為特別。

而主打嘅手工Pizza就係必試之選，其中一款係Parma Ham Pizza $168，Topping有蕃茄醬、莫薩里拉芝士 (Mozzarella Cheese)、Parma Ham, 帕馬森芝士 (Parmesan Cheese)，材料為意式Pizza，份量上4個人食都足夠。手工Pizza的確係正宗Pizza製法，而非港式Pizza製法，餅底好薄，稍有脆身，入口薄脆，Pizza攞上手時，可見餅底係比較柔軟，可以捲得起。而兩種芝士嘅濃郁度亦恰好，唔會太膩，芝士溶化時亦可以拉絲，視覺效果亦不俗。

延伸閱讀﹕港版夏威夷！東涌長沙下村3公里長外國風沙灘天然海岸線海天一色絕美沙灘賞鑽石粉紅夕陽

E.A.Tips﹕

(1) 從浪高海岸轉入小路，經過Bathers Restaurant & Bar，即可到達嶼意坊Lantana。

(2) 食Pizza飲埋酒會更Chill，比較平嘅酒係Tiger Draft $40/half、$75/pint。

(3) 沿長沙下村行，一直行到小路盡頭，可以於浪高海岸旁邊泊車，不過車位就唔多。

(4) 部份菜式詳情請睇官網。

(5) 餐廳同沙灘相連，食完嘢可以即刻行過去沙灘玩。

(6) 從東涌市中心巴士總站乘搭大嶼山巴士路線1, 11, 23號，於長沙下村站落車，前行可見長沙下村、下長沙泳灘嘅路牌，下行3分鐘即達沙灘；而由東涌市中心位置乘搭的士到浪高海岸，車程約15分鐘，車費大約$80至$90。

(7) 以長沙下村為目的地，或者直接Google定位浪高海岸會比較容易搵到。

(8) 浪高海岸、長沙下村沙灘前有幾個停車位，可容許幾架車輛停泊，只需沿長沙下村小路駛入就會見到。但駕駛到大嶼山長沙下村，必須預先申請許可證，情況有如搶平機票，最好一個月前兼朝早7點登入搶證，因為每日只會派發25張許可證，而其中5張係俾電動車用，換句話講即係得20張汽油車。搶到許可證後，就要上網熟讀大嶼山自駕遊小冊子，而行車證最好擺返車頭，以茲識別。不過自駕遊只限星期一至五，時間08:00-19:00，可穿越大嶼山、昂平、大澳、長沙、梅窩等地方。

(9) 小店只收Cash或轉數快，記得帶齊錢啦。