[sig_post_pv label=””] 個人瀏覽過
台灣中部有一條非常出名嘅「彩虹眷村」，每個去到台中嘅旅客都會到訪佈滿繽紛色彩嘅彩虹眷村打卡，拍拖情侶們可於壁畫前影吓相，但目前無得去旅行，暫時只得留喺香港，其實香港都有3條「彩虹村」。但此村不同彼村，所講嘅並非位處九龍東嘅「彩虹邨」，而係富有特色嘅壁畫村，每條村落都畫上色彩豐富嘅壁畫，用色吸睛。兩個人一日之內可以走完3個壁畫村，想輕鬆啲亦可以分3日行，倘若再加上食埋台灣菜，真係有台灣之旅嘅感覺。
第一站﹕粉嶺坪輋壁畫村
一大清早時間尚早，可以先入粉嶺，皆因週末於粉嶺市中心乘搭小巴前往目的地坪輋比較困難，一條56K小巴路線可以到達多個戶外或行山景點，小巴站往往人頭湧湧，可以做嘅就係鬥早、鬥快，比一般人更早走完呢個行程。位於新界北部打鼓嶺嘅粉嶺坪輋壁畫村帶有神秘感覺，村內多間小屋牆身都被髹上彩色壁畫，重有唔少環保裝飾。一幅幅用色豐富嘅壁畫吸引眼球，一年後再前往坪輋壁畫村，會發現地面有加上萌爆Emoji圖案。不過，又有幾多人知道坪輋壁畫村繪畫壁畫背後嘅原因呢？
延伸閱讀﹕粉嶺神秘壁畫村 每個角落都有藝術感
延伸閱讀﹕3小時長征港版萬里長城！華山軍路連綿芒草 上水紅橋新村行到粉嶺坪輋壁畫村 黃昏坪洋白茅草原打卡
第二站﹕荃灣光板田村壁畫村
由粉嶺直入荃灣，可以乘搭巴士路線278X，又或其他巴士路線到城門隧道轉車站轉乘46S,73D,73P,73X, 278A,278P,278X路線到荃灣市中心，步行前往荃灣愉景新城後，即可從秘道通往另一條壁畫村。離愉景新城只係15分鐘步程，即可以去到荃灣光板田村，村內畫風內容獨特，有彩虹小屋，地上亦畫有康樂棋、波子棋，壁畫包含光板田村聞名嘅大樹菠蘿、自家製蜂蜜，壁畫分佈係3個村落中最集中。村內亦有一道長長嘅彩虹樓梯，離遠睇似足七色階梯，場景夢幻。
延伸閱讀﹕荃灣隱世壁畫村 光板田村七色階梯打卡
第三站﹕元朗羅東肉焿番
朝早一連行咗兩個壁畫村，大概已經饑腸轆轆，乘搭68M等巴士路線可以從荃灣直入元朗國，品嚐地道台灣菜。位於元朗小巷內嘅人氣小店羅東肉焿番既係良心店，亦主打正宗台式美食。羅東肉焿湯米粉、魯肉飯、冬瓜茶、芋泥吐司等都係著名台式小食，一份便當價錢合理，份量適中。
延伸閱讀﹕元朗正宗肉焿極滋味 歎古早味台式小食
第四站﹕錦田壁畫村
既然走入元朗，當然要行埋錦田壁畫村啦！相比前面兩個壁畫村，錦田嘅壁畫相對分佈得比較散落，延伸到其他地方，合共有近40幅，而且不斷更新，要走完所有壁畫應該要行晒錦田多個村落。另外，部份壁畫靠近馬路旁邊，影相時要比前面兩個壁畫村更需要注意安全。
第五站﹕屯門木玥巷
行完全香港3個壁畫村，可以由元朗走入屯門，歎台灣紅燒牛肉麵。台灣菜係可以止旅行癮嘅其中一個方法，呢間比較新嘅台式餐廳，既有滷肉飯、鹽酥雞、珍珠奶茶、水果茶，當然唔少得招牌牛肉麵。牛肉麵由半島大廚主理，以特別方式炮製牛肉麵，湯頭經過調校，清甜微辣之餘，亦有燉煮牛肉味道。重點係，梗係幫襯返同路人啦！
