馬鞍山迷你Afternoon Tea 拍拖悠閒歎自家製鬆餅+咖啡

[sig_post_pv label=””] 個人瀏覽過





Afternoon Tea係唔少女士或少女愛追求嘅美食選項,大多數人都會去酒店拍拖歎下午茶,但事實上有幾多間酒店係香港人值得選擇?編輯曾經都有去酒店歎下午茶,但逐漸發覺要對得住手足,就更加應該堅持同路人嘅良心經濟圈,即使想食Afternoon Tea,都應該搵返相關小店,一個人、兩個人堅持未必有好大效用,但如果每個人都堅持……每個人都堅持嘅話……

今次走入馬鞍山歎個迷你Afternoon Tea,呢間咖啡店由坪洲搬出嚟馬鞍山,前身為坪洲好運來咖啡店,以自家製麵包、鬆餅、蛋糕、手工意粉為主,通通無添加,而同類型店舖唔多,都算係馬鞍山區內小確幸。室內裝潢簡潔,有開放式廚房,木質主調加小植物擺設為主,僅為典型文青Cafe裝修,大玻璃窗外望比較少車少人嘅街景,似外國鄉郊小店,尚算舒適。

據稱,鬆餅為每日烘焙,必食嘅一定係花華Scone配自家果醬及軟芝士$68,比平時原味鬆餅稍有分別,鬆餅內含無花果乾,同麵糰融為一體。整件鬆餅大小適中,質感比坊間鬆餅濕潤,稍有烘焙酥香,比較軟身,並非平常嘅乾爽感覺,表皮只有少量脆感,切開則稍有鬆散感,有少少似Muffin,而麵糰略帶幾分煙韌感,幾特別。



平常鬆餅有時會加入提子乾,帶香甜味;今次變成無花果乾,味道較輕,僅屬微甜,帶有清新感覺。鬆餅旁邊既有軟芝士,亦有自家製金桔果醬,軟芝士同平常嘅Clotted Cream差唔多,繼軟滑,配合鬆餅比較淡身,而果醬則比平時嘅現成水果果醬淡身,甜膩感較輕,略有清爽感。

鬆餅Tea Set 有連嘢飲,只係加幾蚊就可以叫埋咖啡,當中咖啡特飲印度奶茶Chai Latte$42 就幾特別,表面有八角茴香,將肉桂、丁香、生薑加入紅茶內,同紅茶一齊熬煮,以至香料、藥草味濃郁,尤其係肉桂、丁香味,幾暖身。


E.A.Tips﹕

(1) 室內座位唔多,平日會比較少人。

(2) 店外玻璃上有寫明每月幾時營業、幾時為休息日。

(3) 穿過新港城中心,經鞍祿街轉出馬鞍山路,靠近新港地二期。

(4) 小店無得預約,週末就要預早啲去啦。


花華

馬鞍山鞍祿街18號MOSTown新港城中心二期地下29-30號舖
星期一全日休息;星期二至日 11:00 – 18:00
5686 7806

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!