錦田高埔村天空之城離市中心僅1公里 No Boundary姊妹店HOLA Chill住歎加料厚多士

[sig_post_pv label=””] 個人瀏覽過

元朗錦田向來隱藏多間值得本地人去試吓嘅餐廳，今次編輯走到離市中心約15分鐘嘅天空之城，發現一間可以幫襯嘅露天餐廳，既有戶外座位，亦有室內冷氣間，以英國菜為主打，亦係一間歡迎貓貓狗狗嘅餐廳，雖然位置稍為偏遠，但兩個人亦可以試一試。

位於錦田天空之城嘅HOLA，其實係No Boundary嘅姊妹店，同樣以英國菜為主要菜式，例如All Day Breakfast、Egg Benedict，小店更有招牌HOLA厚多士，價錢方面尚算親民，一般都維持喺$68至$88，只係甜品比較貴，定價於$128。

戶外座位比較悠閒，天氣炎熱時有太陽傘遮擋太陽，怕熱亦可以坐室內冷氣座位，室內裝潢就有幾分工業風格，比較適合姊妹聚會傾偈或情侶拍拖談心。雖然天空之城位處近郊，附近亦無乜高樓大廈，環境似模仿外國環境，加上呢間餐廳有英倫風格，不過編輯覺得整個天空之城就反而有幾分似國內地方，等同新田購物城，有種味道係如同舊時亞洲電視滲透出嚟嘅亞視味一樣無辦法解釋得到。

小店以All Day Breakfast聞名，份量唔少，而當中更有素食選擇，HOLA Vegetarian 素食無邊全日早餐$88，包含牛乳炒蛋、白蘑菇、英式茄汁焗豆、香煎蕃茄、牛油焗粟米、波特菇、沙律菜、香酥小牛角包，茄汁豆暖笠笠，略有香味，並非純粹罐頭倒出嚟，炒蛋則滑溜可口，有採用牛奶炒蛋，沙律菜配有胡麻醬汁；但波特菇唔香口，牛角包比較迷你。紅腰豆雜菜素食沙律$68 份量甚多，幾新鮮，蔬菜清新，粟米粒香甜，紅腰豆有咬口而比較突出，相對前菜，其實更適合飽餐後緩和味蕾。

另一款招牌菜係Egg Benedict，而雪花牛班尼迪蛋$98 配上Marbled Beef，取代煙三交魚或煙肉，兩片意大利包玩沙律菜、水波蛋、荷蘭醬之餘，更加入雪花牛，水波蛋為半熟流心蛋，唔能夠轉熟蛋，切開時溫暖蛋汁滲透雪花牛、麵包內，黏滑可口；而意大利麵包就比較韌，難以完全切開，表皮烘烤過，略脆，麵包內裏就煙煙韌韌。

當中招牌之一係HOLA Thick Toast，即咸牛肉野菌拉絲芝士流心蛋黃配厚多士$98，厚切多士焗得脆口，多士之上再釀入多款餡料，包括咸牛肉、野菌、芝士，表面再放上一隻流心蛋，然後掃有一層蜜糖。流心蛋黃呈半熟狀態，切落去蛋汁流於麵包內，加上半溶芝士，質感黏稠，牛肉帶微咸，好香口，層次豐富，令一份多士帶上幾分邪惡感。

至於德國煙燻腸蕃茄汁長通粉$68 則不過不失，通粉稍為偏硬，並非軟淋淋質感，茄醬唔算多，大支腸比較乾身，但有煙燻味。而3X3炸雞翼拼盤$88 有3款唔同口味，有蜜糖味、芝士味，重有一款味道唔明顯，食唔出，3款都為脆炸雞翼，香脆可口，炸粉唔厚，雞肉唔乾身。

甜品方面有Glamazonian Toast $128，但製作時間需要15至20分鐘，有冰火交融感覺，底部為暖笠笠多士，上層則為冷冰冰雲呢嗱雪糕，再淋上朱古力醬，加上插有一片脆卜卜香烤焦糖，香甜味十足，兩個人食超Sweet！

夢之沙冰特飲$58，包含To Alice 薰衣草士多啤梨、A flower is not a flower 接骨木花熱情果青蘋果，前者有濃郁士多啤梨沙冰味，但就缺少薰衣草香味；而後者就有青蘋果酸甜味，加上啖啖清香味，幾清新。梳打特飲$48係一杯望落幾抵飲嘅打卡飲品，有七種顏色可供選擇，當中有藍柑橘粉紅葡萄柚，酸中帶甜，為有汽特飲，上下都有一個杯，簡單嚟講上杯就係下杯嘅後備，飲完有可以Refill嘅感覺。至於榛子咖啡$38 呢類咖啡系列係比較穩陣之選，咖啡有微微咖啡香味，唔算好濃，大概係咖啡豆問題，而奶泡亦滑溜，可拉花，不過似乎奶泡方面唔夠持久，上枱無耐已經有沉降跡象。

E.A.Tips﹕

(1) 天空之城為類似新田購物城嘅地方，位置空曠，人流唔多，店舖亦少，而且交通不便。

(2) 由錦田紅磚屋步行到天空之城，穿過吉慶圍，腳程約需要15至20分鐘；但天空之城外面為單車徑，踩單車就會比較方便。

(3) 於大欖隧道乘搭巴士路線251B可以到達蒙養小學，步行到天空之城亦需要10分鐘步程；而比較方便係乘搭巴士路線54,64K,68E, 77K,268M，或者小巴路線71,72,78, 601,602,602C, 608,620於高埔村落車，步行到天空之城只係2至3分鐘步程。

(4) 由天空之城直行到近末端，就會見到HOLA喺右邊。

(5) 小店為寵物友善餐廳，歡迎寵物進入，不過都謹記要好好看管自己嘅寵物，唔好放任寵物亂走。

(6) 店內設加一服務費，接受Credit Card或Cash付款。

(7) 天空之城有免費停車地方，但車位唔多。

(8) 有朋友生日嘅話，可以預先同小店講聲，甜品可以有生日牌。

(9) 天空之城離南生圍入口只係20至25分鐘步程。

(10) 留意飲品全部採用環保飲管。