[sig_post_pv label=””] 個人瀏覽過
深水埗有唔少文青咖啡店，單單大南街就有少至3間相類似嘅小店，拍拖兩個人不妨探索吓。當中以花草為主調、以小房子命名、樓高兩層嘅咖啡店就係其一，裝潢陳設係典型吸引少女嘅文青咖啡店，年頭居於台灣嘅文青女神蔣雅文就曾經專程返回香港，並於此店舉行攝影展。
舊店位於油麻地唐樓嘅小房子，上年底至今則選址深水埗，編輯認為幾年前嘅舊店比新店點題，亦較有水準。小店以花草圍繞一室，以木系陳設配搭日式風格，當中加插復古擺設，如Tatami、屏風、乾花、木鋼琴等，風格並非獨特，只係有種「集幾家之大成」嘅感覺，反正大多數少女都係鍾意打卡，而且樓高兩層，有特定素材就已經能夠吸引客人。不過，樓上座位就唔太舒服，皆因小店明顯想模仿日式設計，但枱太高，坐於地面用餐時，比較辛苦。
以下午茶為例，只有2款主食可擇，以日式料理為主，包含日式飯糰餐$108、桂花木魚湯冷素麵$128，同樣可配2款小食、時令水果。當中，有北寄貝沙律、小女子即日式魚乾，麥麵豉青瓜、一口小甜薯、抺茶蕨餅，食物唔太突出，尤其眼見網上好多人大讚食物質素，最真實嘅感覺係屬理想與現實水平。冷麵簡約，為普通人能夠炮製嘅水平，只為醫肚，魚乾就為街邊貨色，蕨餅煙韌且甜度適中，抺茶亦無苦澀味，而西瓜則唔太新鮮。試過舊店可能會得知小房子嘅特徵係價格高而份量少，但味道尚且不俗，而深水埗店則似乎連原有水準亦逐漸失去。
今年初，深水埗店曾借出場地予文青女神蔣雅文（Mandy）舉行攝影展「浮游」，該小型展覽作品以其獨遊姿態拍攝而成，以film soup手法將港式飲品材料呈現獨特色彩嘅香港風景，故編輯先再度留意到此店。
飲品基本分冷熱花茶、梳打、Cold Brew$45，當中有薄荷蜜桃梳打$50、櫻花梅子梳打$50，前者只為薄荷葉配罐頭蜜桃、梳打水，後者以淡粉紅色為主調，為少女系飲品，只不過杯內唔見有櫻花裝飾，以梅子配梳打水，似醃製後嘅酸梅乾，另有啖啖香精味，花茶或者比較穩陣，只不過天氣太炎熱。
甜品蛋糕每件約$58，如磅蛋糕，而新鮮出爐蛋糕配茶或梳打一律$88，至於雪山多士$78為招牌作之一，亦係人氣之選，配有藍莓、士多啤梨，桃、紅酒蘋果作材料，麵包多士上放有雪糕球、忌廉，製作需時約20至30分鐘。烤焗過後，多士脆口，頂端有微甜忌廉，忌廉下方為雲呢嗱口味雪糕球，而雪糕旁邊則為多士，再伴有各類水果，冷熱交融配搭係吸引味蕾嘅。4款水果當中以紅酒蘋果較為特別，蘋果浸得軟腍，被紅酒醃製過，有陣陣酒香，比罐頭蜜桃較有意思。
E.A.Tips﹕
❷ 甜品雪山多士僅限下晝2點至5點。
❸ 只有黑板為餐牌，蛋糕需要到櫃枱查看。
❹ 下層tatami座位多數有人坐，想坐就可能要book位，而上層基本上唔使特別Book位，不過就未必坐得舒服。
❺ 食物一般售完即止，唔少下晝隨時會無。
❻ 花茶可無限加水，不過要加$20。
❼ 逗留時間基本上無特別限制，可以用作消磨時間。
❽ 下層Tatami、上層位置皆需要脫鞋入座。
小房子
- 深水埗大南街196號地舖
- 星期一至二 13:00 – 18:00、
星期三至日 11:00 – 18:00
- 5209 7610
在〈深水埗兩層高小房子繼續賣雪山多士 新舊店大有不同？〉中有 1 則留言
留言功能已關閉。