萬宜水庫東壩位處西貢糧船灣，當中有一條萬宜地質步道，可以觀賞優美天然靚景，包括水庫同青山綠水，加上六角形岩柱天然地質奇觀，絕對適合拍拖兩個人輕鬆半日遊。
西貢嘅六角形岩柱係由於1.4億年前猛烈火山噴發產生大量炙熱熔融火山物質冷凝收縮造成，特殊環境先會出現嘅天然奇觀，六角岩柱群相當壯麗！岩石結構同化學成分同其他國家嘅六角形岩柱有分別，而且分佈廣，面積較大，堪稱世界級地質奇觀。
新建嘅木橋步道全長約1.4公里，呢條步道比較平坦，容易步行，適合兩個人Hea住郊遊，仰望有石崖同岩柱，足足百尺高，連綿海岸，天然環境令人讚嘆。
東壩防波堤可抵禦海浪，以免地基被潮水沖蝕，工字石墩似足錨一樣，放埋一齊好似好多舊大型積木砌成嘅城牆，Pattern的確係幾有趣。喺東壩上仲可以眺望破邊洲，破邊洲就係一個切割小島。
早前有人曾因行出防波堤、疑跨過指示牌或行去破邊洲方向，而分別意外跌喺工字石墩之間嘅空隙、以及從上墮下，所以小編特別提醒大家要小心安全，自問年輕同身手敏捷嘅小編，行過工字石墩亦只挑選同原路直接連接兼無空隙嘅一個位置影相，亦無打算行到危險方向散步。
由北潭涌行入萬宜水庫東壩大概需時2.5小時，東壩位置偏遠，回程必須預留充足時間，約2至3hrs，否則最好都係坐的士返西貢，避免入夜回程。
E.A.Tips﹕
（1）出發前記得帶足夠水、食物、同防曬用品；
（2）本來東壩只係一個散步地方，基本上危險度不高，但早前有人疑因行東壩打卡釀成意外，故特別提醒大家打卡要量力而為，千其唔好為打卡行到有危險嘅地方，見到有指示牌寫住禁止跨過就唔好強行跨過啦！
交通﹕
喺西貢市中心搭94號巴士，車程約20分鐘，北潭涌落車；
或9A綠色小巴，約20至25分鐘一班車，僅15:00至18:00逢假日服務，往返北潭涌與萬宜水庫東壩；
兩者都係經大網仔路，到分叉口靠右行，沿西貢萬宜路行9km。
延伸閱讀﹕泥涌影天空之鏡 天陰陰影吓靚相
延伸閱讀﹕隱藏科技大學旁 白水碗沙灘處處影相位
萬宜水庫東壩
| 地址﹕ | 萬宜水庫東壩, Sai Kung |
| 開放時間﹕ | 24hours |
| 電話﹕ | 2394 1538 |
| 地址﹕ | 萬宜水庫東壩, Sai Kung |
| 開放時間﹕ | 24hours |
| 電話﹕ | 2394 1538 |
