大圍純白咖啡店恬靜悠然 主打清涼烏龍麵



[sp_html5video category=”2137″]

座落於大圍比較幽靜嘅街道,呢間純白咖啡店充滿日台Style,一棟兩層樓高嘅潔白小屋從四周矮樓房同小商舖等突圍而出,兩個人入去食餐飯都可以感受片刻恬靜。

近年文青Cafe湧現,愈開愈多,室內環境係可以吸引途人進入餐廳嘅因素之一。呢間以「屋子空間」命名嘅咖啡店,顧名思義以雪白小屋設計,提供一間室內空間,可以放空或休息,最啱拍拖去Hea吓。除咗咖啡、果茶外,亦提供午餐同下午茶,主打輕食,最平40蚊就有一碗飯!

屋子空間門口有一個打卡位,有涼風時坐低幾Chill,不過最近開始炎熱,室內有冷氣就比較舒服。下層為點餐位置,亦有少量座位對窗而坐。步行上樓梯可以抵達上層,座位唔少,同樣有對窗而座嘅座位,亦有靠牆嘅位置,偌大窗戶採光度高,陽光透入可使一室溫暖,相當舒適。盡頭更連有一個小露台,拉開趟門即可感受室內外嘅分別,同時可直接沐浴陽光下,感受天然環境。

下午茶有溫泉蛋七味唐揚雞丼,輕盈版只係$40,有香脆嘅唐揚雞,外面輕脆,雞肉軟嫩,珍珠米亦夠煙韌,配搭流心狀嘅半熟溫泉蛋,將流心溫泉蛋刺穿,蛋汁滲入珍珠米內,互相融合,珍珠米變得黏稠,入口有啖啖蛋香味。

午餐有柚子蕃茄烏龍麵,一碗$66,烏龍麵超煙韌,入口彈牙,條條順滑,配搭柚子蕃茄等相當清新,顏色鮮艷,表面仲有些微木魚作點綴,柚子、蕃茄、青瓜等味道配合,味道酸酸甜甜,好開胃。加上滑溜嘅烏龍麵,一啖入口有清涼感覺,清爽得極適合夏天食用,好fresh。

e.a.tips
(1)上層室內坐滿時人流偏多,當食客唔識降低聲線時,其實都幾嘈吵,建議坐下層、出露台或直接坐門口旁邊位置。
(2)露台或門口旁邊位置有機會有蚊出現,惹蚊嘅朋友需要留意。
(3)據了解,仲有得上一至兩層樓,分別係美甲坊同工作坊,但事實上當日見到「Staff Only」,似乎唔係經常開放俾公眾使用。

交通﹕大圍公共運輸交匯處旁邊為積富街休憩公園。

延伸閱讀﹕上環特色咖啡店x茶記 中西合璧應該快食定慢食?

屋子空間

地址﹕ 大圍大圍村9街12A
營業時間﹕ 星期一至四 11:30 – 20:00;星期五至六 12:30 – 21:00;星期日及公眾假期 11:30 – 20:00
電話﹕ 2377 9173

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈大圍純白咖啡店恬靜悠然 主打清涼烏龍麵〉中有 2 則留言

留言功能已關閉。