佐敦開餐 DINEINN

抗飲食業寒冬? 佐敦小店疫市開餐 必食酸菜魚湯河



[sp_html5video category=”2172″]

疫症期間,飲食業步向低迷,餐廳能夠生存已經難得,最近佐敦竟然仲有一間小店喺逆市開張,寫名香港人食堂,更打入黃色經濟圈,4月至5月撞正政府限聚令,餐廳現場人流仍然一個接一個。

餐廳做足抗疫措施,包括為客人量度體溫,提供消毒用品,同時提供紙袋存放口罩,非常貼心。而每張枱之間保持1.5米之距,座位有限,等候外賣嘅人數較多。餐廳名稱以開餐命名,十分簡單,英文則為Dine Inn,Inn喺外國有住宿小型餐館意思。據了解,餐廳係由前珠寶商人開設,由賣金轉為賣黃到金嘅餐廳,小編相信係一個良心老闆。

至於食物方面,亦相當符合香港味道,菜式好國際化,諗得出嘅基本上都有,日式蕃茄湯麵、日式鰻魚飯、台式半筋半腩飯、越式生牛肉湯河、中式酸菜魚湯河、港式豬酒渣撈飯、港式四寶湯河、素食珍菌湯河、星菜喇沙湯麵,菜式絕不單一,可以迎合唔同口味。唔少菜式更隱含政治意味,包括五大素球嘅素食、勿忘初心嘅油菜、香港人雜扒飯、印有良心嘅平安湯,仲有印有香港人加油嘅滋潤特飲,有明目圓肉杞子蜜、養生牛蒡冷泡茶同解毒胎菊花蜂蜜。

最大特色係有一人份量嘅酸菜魚片湯河 $54,一般比較少見以酸菜魚為湯底嘅粉麵,呢間小店嘅酸菜魚為一人前,唔需要成鍋咁叫,都可以食到酸菜魚,最啱過口癮。湯底有酸菜、辣椒、魚片等酸菜魚必備材料,製法簡單,偏偏比較少人會做,湯底有酸菜魚湯味,酸菜味適中,酸味唔算太重,帶微微四川辣椒味,適合炮製呢種粉麵湯底,飲咗幾羹都唔口渴,感覺無味精,因為酸菜本身都有味。魚片新鮮,嫩滑無骨,啖啖肉之餘無腥味,酸菜湯底正好為魚片提味,好過去大陸食酸菜魚啦!

另一款係喇沙雞球帶子湯麵 $58,喇沙湯底幾濃厚,啖啖椰香好香甜,比酸菜魚湯底明顯較濃郁,以雞肉同帶子為餡料,雞肉同帶子味道較淡,但唔會韌到難咬同黏牙,麵底為拉麵,拉麵比雞肉同帶子掛湯,拉麵吸附到喇沙湯汁,入口酸甜帶微辣口感。

香港人特飲採用可以循環再用嘅膠樽盛載自家製嘅花茶,今次一口氣試試明目圓肉杞子蜜解毒胎菊花蜂蜜兩款,每款+$10。便利店買樽嘢飲都唔只10蚊,呢幾款花茶凍飲好足料,每杯新鮮炮製,愈泡愈濃,個樽可以拎走,樽上印有香港人加油字樣的確好靚!明目圓肉杞子蜜入口只係微甜,啖啖食到桂圓肉同杞子,有安神、明目同治失眠功效,桂圓肉可補血,適合女士們經期後飲用。而解毒胎菊花蜂蜜亦好清甜,只係少量蜜糖味已經好足夠,最啱解膩。

餐牌內各款菜式價錢唔高,一般人都可以食得起,人均50至60蚊都可以食到一餐,難得菜式有水準,適合兩個人拍拖去食,可以俾被武漢肺炎影響去唔到旅行嘅香港人都可以品嚐各地美食。

e.a.tips
(1)餐廳撐醫護,特別延長優惠,外賣自取可享8折優惠,留意到外賣好似係用紙盒,夠晒環保。
(2)可能開張初期,餐廳每人送一包鮮奶,如果叫咗餐飲建議先飲鮮奶,避免鮮奶變質。

交通﹕彌敦道落車嘅巴士都可到達。

延伸閱讀﹕渡船角喺邊?《大事件》取景地 八文樓集體回憶係汽笛聲?

延伸閱讀﹕平食自助餐! 普慶餐廳半自助甜品Buffet $120任食10款Mövenpick雪糕

開餐(Dine Inn)

地址﹕佐敦白加士街19號地舖
電話﹕3996 8599

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈抗飲食業寒冬? 佐敦小店疫市開餐 必食酸菜魚湯河〉中有 1 則留言

  1. 自動引用通知: 【3低本地遊】佐敦原名叫乜? 徒步西九睇日落 兩個人平食酒店自助餐 – eatwo 兩個人醫吓肚

留言功能已關閉。