黃埔海旁美人蕉花海打卡

黃埔至尖沙嘴海旁驚喜影相位 美人蕉花海打卡



海濱花園最啱就係兩個人散吓步或跑吓步,沿海旁而走,海風輕吹,環境舒適,亦可以坐低Chill吓。由黄埔海濱長廊行到尖沙嘴海濱花園,貫穿黃埔、紅磡至尖沙嘴,最適合觀賞維多利亞港,除咗散步同釣魚,仲可以發現一個個鮮為人知嘅影相位,絕對係最值得去嘅香港海岸步道。

由黄埔海濱長廊作起點,沿海景色一覽無遺,大海比尖沙嘴海旁更遼闊,不時見到有釣客垂釣,不單可以直視對岸景色,亦可以望到紅磡同尖沙嘴方向景致,甚至可以遠眺九龍灣方向建築物同景觀,黃埔海旁景觀比紅磡同尖沙嘴更遼闊。

而黄埔海濱長廊欄杆以湖水綠色設計,花紋同用色都相當搶眼同特別,遼闊大海旁邊打卡絕對可以呃Like。當尖沙嘴海旁影無可影時,不妨行遠些少去黃埔海旁打卡啦!

經紅磡海濱花園,步行到2011年9月先開幕嘅尖沙嘴海濱花園延伸部分,有一個超驚喜嘅打卡位!靠近尖沙嘴海濱花園延伸部分,會發現有一個神秘花海可以打卡,既然武漢肺炎令香港人未能去旅行,不如抗疫期間留喺香港影吓相,識影一樣可以影到假裝在日本嘅靚相。

美人蕉顏色鮮艷,花瓣偏大,開於頂端,株形好,總狀花序從莖頂抽出,花色一般有紅、桃、橙、黃或雙色,今次近尖沙嘴嘅美人蕉呈橙紅色,有斑點,外圍偏黃色,係雙色美人蕉。而樹葉亦較寬大,呈長橢圓形,似足芭蕉葉或蕉葉,葉底仲有些微乳白色脈紋。

有「連理永生」音意嘅美人蕉嘅學名係Canna Indica,英文名為Canna Lily,本身原產地係熱帶同亞熱帶地區,屬單子葉植物薑目美人蕉科(Cannaceae),一般喺有陽光又陰涼通風嘅地方生長,花期為5月至11月,果實係蒴果,呈卵狀長圓形,帶軟刺,未熟時為青綠色,熟透會變黑色,長約2至3cm。

E.A.路線﹕黄埔海濱長廊>紅磡海濱花園>尖沙嘴海濱花園延伸部分>尖沙嘴海濱花園

e.a.tips
(1)可以由尖沙嘴方向為黃埔方向作起點,不過尖沙嘴海濱花園比較長,而且黃埔景觀較好,建議以黃埔為起點。
(2)美人蕉花海位置靠近尖沙嘴海濱花園延伸部分,不過生長得唔高,絕對係150cm女生限定。如果你係170cm以上,sorry你太高啦!
(3)美人蕉花海最佳拍攝位置有一條小路,只需企喺渠蓋上,唔需要踐踏任何花草,一樣可以影到靚相。

延伸閱讀﹕紅磡古早味蛋糕店千變萬化 每次3款口味同時出爐

延伸閱讀﹕尖東死場驚現文青咖啡店 藍莓味貝果勁煙韌

交通﹕
(1)由黃埔作起點,可乘搭紅磡渡輪碼頭,步行去黄埔海濱長廊僅幾分鐘腳程;近地鐵黃埔站B出口,經過黃埔天地時尚坊,沿德安街向海旁步行,10至15分鐘左右即達;亦有好多往紅磡或黃埔嘅巴士線可達。
(2)由尖沙嘴作起點,可乘搭天星小輪,碼頭落船即達;地鐵近尖東站L6出口,可沿梳士巴利道到海旁;又或乘搭巴士到尖沙嘴巴士總站落車,即達海旁。

黄埔海濱長廊

地址﹕紅磡德豐街20號
開放時間﹕24hours

紅磡海濱花園

地址﹕紅磡灣
開放時間﹕24hours

尖沙咀海濱花園(延伸部分)

地址﹕紅磡
開放時間﹕24hours

尖沙咀海濱公園

地址﹕尖東
開放時間﹕24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈黃埔至尖沙嘴海旁驚喜影相位 美人蕉花海打卡〉中有 2 則留言

留言功能已關閉。