[sp_html5video category=”2387″]
屹立尖東39年嘅好時中心，近年逐漸由昔日鬧區變死場，尖東區喺80至90年代曾經係人流滿滿嘅地方，為區內寫下光輝一頁。不過，近年商場內一片沉寂，仍然營業嘅商舖普遍比較舊式，相對尖沙嘴中部嘅繁華同新式商店，人流明顯較少，商戶收入連帶下降，一般人除咗夏天行入商場歎冷氣之外，喺呢個商場基本上好難有動力行街。但近兩年，商場竟然有一間超新淨咖啡店選址好時中心，到底呢間咖啡店可唔可以改變座落死場嘅命運？
延伸閱讀﹕隱藏於超靜商場 高質沙嗲串燒+海南雞飯
以Courage Eighteen命名嘅小型咖啡店，據悉意指18歲的勇氣，店主由18歲開始，抱住追求夢想嘅勇氣，開設呢間咖啡店，連咖啡店內店員亦個個都係年輕人，唔好睇少年輕人，個個服務用心又有禮貌，執位執得快，細心又話頭醒尾。除咗普遍咖啡店都有嘅All Day Breakfast同輕食，特別以咖啡同貝果為主打，價錢合理，份量十足，門口仲有個小小打卡位，霓虹燈牌貫徹店名Courage，鼓勵大家要有勇氣追求夢想，最終可以實現夢想，幾有文青風格。
咖啡店面積唔大，室內狹長，以開放式廚房設計，食物達標，燈光昏黃，鎢絲燈泡偏向工業風，枱櫈以木質同白色為主調，氣氛悠閒，暖調更顯和諧溫暖，環境舒適，最啱假日拍拖去歎返個簡單嘅Brunch，加多杯咖啡，碌吓Facebook睇天下事、或者膚淺地上IG打句品味生活，文青生活都幾寫意。疫症期間，小黃店做足抗疫措施，加上無咩遊客，只有香港人，保證食得安心又放心。
咖啡選擇多多，咖啡香充斥小店內，簡單坐低先歎杯Cappuccino $35，小小咖啡杯加入跳脫圖案，一新耳目未嘗唔係好事。咖啡有靚靚拉花，圖案好精緻，味道有水準，香濃咖啡味好醒神，入口滑順舒服，奶泡打得恰到好處，咖啡甘香味略有餘韻。
仲有可以refill嘅Deutsch Flower $45，以成壺茶壺上枱，Deutsch係德文，花茶中包含有機接骨木莓果、玫瑰果、香檸雜果茶、荔枝茶。入口有種類似酸梅味，但未至於話梅味，第一啖有少少澀味，refill後澀味同梅味減輕，酸甜味更突出，飲完好舒服，似足消滯茶，而且可以無限refill。
輕食當中可選擇咗安格斯牛柳粒沙律 $74，大大粒Angus beef cube，份量唔少，仲好厚肉，入口軟嫩，唔會韌，充滿肉汁，香而不膩，有飽肚感。配搭清爽veggie可中和油膩感，沙律唔簡單，有香甜嘅蘋果片、鮮甜嘅蕃茄粒、清甜嘅洋蔥，加上爽脆嘅羽衣甘藍同火箭菜等，夠晒清新，灑入特別又eye-catching嘅調味粉，色彩豐富，賣相一流，再淋上黑醋同沙律汁，酸甜味好醒胃，層次好豐富。
而不得不試嘅仲有貝果配牛油果炒蛋啡菇 $68，將軟滑炒蛋、微鹹啡菇同新鮮牛油果夾於Bagel內，令整體好爆餡，超抵食！貝果有啖啖藍莓味，入口超煙韌同鬆軟，用刀切未必可以輕易切開，質感唔會太厚太硬，乾濕度恰好，表皮唔算脆，如果烘一烘會更好，配料其實仲有好多選擇，份量十足，食完成舊夠晒飽肚。內餡當中以牛油果最配合，牛油果質感滑溜，好新鮮，入口creamy，含豐富維他命E，有適量油脂同纖維；而炒蛋亦尚算軟滑，加入牛奶炒係香滑啲，但略嫌有少少過熟，但整體蛋香味濃，亦唔油膩，仲有啲蛋汁順住向下流落貝果中；至於最底層嘅啡菇只係微鹹，幾多汁，調味過加上炒過就更香。貝果隔離同樣有沙律菜，添加黑醋後亦好開胃。
| e.a.tips （1）咖啡店位置唔多，大部份只係二人至四人枱，基本只有一張大枱可容納五至六人，加上疫症期間唔會安排搭枱，好多時都會出現兩個人坐四人枱情況，等候時間會較長。 （2）建議人齊先好入座，唔好霸佔一張枱太長時間，尤其假期下晝繁忙時間，當日見到一個男仔入座霸位後，等遲到嘅女朋友等咗至少15分鐘，兩個人夠自私係可以延長其他排隊人士嘅等候時間。 （3）有兩邊入口，一邊喺好時中心G/F，對面係九龍香格里拉大酒店，另一邊入口對面就係安達中心，但等候入座基本要去返好時中心商場內排隊。 （4）需要自己去收銀處落單，無任何加一服務費，落單後等一陣，店員就會將食物送上。 （5）無乜人先好呆上1至2小時，想坐耐啲最好揀平日去。 |
交通﹕乘搭渡輪或巴士到尖沙嘴或紅磡，咖啡店位處好時中心內，商場位置喺九龍香格里拉大酒店同尖沙嘴中心對面，近尖沙嘴海濱花園。
延伸閱讀﹕隱藏於超靜商場 高質沙嗲串燒+海南雞飯
延伸閱讀﹕半百老牌冰室 必食超濃蕃茄湯+蠔油雞翼
Courage Eighteen
| 地址﹕ | 尖沙嘴麼地道63號好時中心地下55號舖 |
| 營業時間﹕ | 星期一至五 07:30 – 18:15；星期六至日及公眾假期 09:00 – 18:15 |
| 電話﹕ | 2682 0665 |
在〈尖東死場驚現文青咖啡店 藍莓味貝果勁煙韌〉中有 15 則留言
留言功能已關閉。