逗留市區太耐，望親都係高樓大廈？今個周末不妨去戶外行吓，甚至放空吓啦！近年喺大埔山寮路開業嘅小型Cafe Mr Cardigan，以白色貨櫃改裝而成，更凝聚植物為裝飾，旁邊又有細小農地，可供租用，可以一嚐喺石屎森林內翻土種菜。唔講唔知，原來視后佘詩曼都曾經喺呢度拍攝廣告。
小型Cafe面質200呎內，空間唔多，貨櫃前形成一個露天茶座，仍然成為文青打卡點。無論一家大細、情侶拍拖路過，定係閨蜜兩個人傾心事都好適合。而貨櫃內裝飾滿滿，甚有心思，無論擺設定家具，都以木質同白色為主調，仲有少量充滿氣質嘅飾物售賣。
據了解，呢間係多肉植物店，位置又有充足陽光，難怪整個貨櫃同茶座都佈滿植物，感覺好有田園風，環境一流！
天氣炎熱，去大尾督散步經過汀角飲吓嘢，主打花茶、梳打同輕食，一杯冰凍紅石榴檸檬梳打只需40蚊，極解暑！小店擺盤好精緻，只係好簡單嘅材料，配合環境即刻好IG-able。小碟有紅石榴、藍莓、檸檬、青檸等，紅石榴醬另外放置小杯內，可以自行調校甜度，加入冰涼梳打後有DIY感覺。
另一杯係38蚊嘅薄荷菊花茶，入口帶幾分暖意，熱飲比凍飲溫和，喉嚨會更舒服。薄荷味較清涼，雖然解渴，但略嫌菊花味唔夠香，如果花茶多焗幾分鐘花香味可能會更重。蜜糖另外用小杯盛載，可以喺菊花茶內自行加上適量蜜糖，令茶中略帶幾分甜蜜味道。
呢個小型露天茶座有幾分世外桃源嘅感覺，最啱消磨時間，不過只係周六、日先開放，有時包場更加唔開放，周末拍拖去大尾督路過不妨兩個人歎返個Tea兼飲杯嘢Chill吓啦！
| e.a.tips （1）最好先上官方Facebook查詢當日開放時間，會唔會有包場，避免白行一趟。 （2）揸車去嘅話，附近村屋小路如山寮路可以泊一陣。 （3）人流多時店內座位會限時1小時，戶外座位比較多，不過有位通常都都照座。 （4）若租用農地，只需每個禮拜去施肥，費用每月400蚊，最少租三個月。 |
交通﹕
（1）由大埔墟巴士總站乘搭75K巴士到山寮站落車，步行即達。
（2）同樣由大埔墟小巴總站乘搭20C綠色小巴，近山寮路落車即達。
延伸閱讀﹕大埔激罕無人沙灘 發掘大自然生態靚景
Mr Cardigan
地址﹕大埔山寮路路口白色貨櫃
營業時間﹕星期六至日 14:00 – 18:00（星期一至五休息）
在〈大埔白色貨櫃露天茶座 周末限定文青打卡熱點〉中有 5 則留言
留言功能已關閉。