大埔激罕無人沙灘發掘大自然生態靚景

2020-06-04 2021-08-10 / summer、單車路、夏天、大埔、大美督、大自然、打卡、抗疫、文青、汀角東海岸、汀角路、沙灘、生態、貝殼、靚景 / 作者: 撰文﹕Miss A ；攝影﹕Mr E, Miss A；設計﹕Mr E

夏天即將來臨，又係時候去沙灘，不過疫症期間個個home office，疫症緩和肯定逼得大家衝出去各個沙灘抖氣。6月未到，唔少沙灘已經被發現人山人海，要搵人流稀少嘅沙灘比較難。今次介紹一個人流稀少、幾近無人嘅沙灘，不單可以兩個人散吓步，亦可以觀賞自然生態，絕對係周末拍拖休閒去好處。

汀角東海岸沙灘位置靠近大尾督，係一個好隱蔽嘅海岸，沙粒混雜唔少碎石、礫石，同時有機會搵到唔少生物。政府曾喺早幾年喺隔離興建龍尾灘人工泳灘，有意支持保育計劃，不過至今8年仍未完工，保育計劃仍未開始，反而一度出現非法傾倒泥頭同廢料嘅問題。

行入沙灘會經過民居，幾分鐘就行到沙灘位置，前面沙灘同一般沙灘無咩分別，再行近海邊會發現係比較濕潤嘅沙泥，泥灘水氹其實都有好多嘢睇，如果天氣晴朗時，可以發現唔少生物如蟹仔、海星、螺仔等。而沙灘附近有一個全港第四大紅樹林，曾獲定為具特殊科學價值地點，資源極豐富，睇準潮汐時間嘅話可以發掘到更多大自然生物。

當日去到係陰天，未能睇到最靚嘅景色，不過就搵到好多唔同種類嘅貝殼，自製一條貝殼頸鏈，大家唔好睇少貝殼，好久以前貝殼曾經好有價值，可以當錢用，係好原始嘅貨幣，擁有貝殼代表可以擁有夢想。

延伸閱讀﹕大埔白色貨櫃露天茶座周末限定文青打卡熱點

e.a.tips
（1）位置靠近民居，記得保持安靜，唔好騷擾附近居民。
（2）沙灘內唔見有沖身或洗手間地方，更加無救生員同防鯊網，如果落水可能有啲麻煩同唔安全。
（3）比較適合純粹散步、睇天然生態、影相或曬太陽，不過唔建議赤腳行走，因為既有垃圾又容易刮損腳，而且沙粒唔幼細。
（4）沙灘連接泥灘，千祈唔好損害任何生態呀。
（5）上天文台官網可以去海洋氣象服務睇潮汐時間，留意大埔滘潮退到水位1米以下嘅日子同時間。

交通﹕
（1）乘搭九巴75K由大埔墟巴士總站上車，直到山寮或汀角站落車，過對面行5分鐘就到入口。
（2）綠色小巴20C同樣由大埔墟巴士總站旁嘅小巴總站上車，亦喺山寮或汀角落車，過對面可見到入口。