好豆製研究所

元朗鮮製豆乳清甜解渴 款款無添加豆味濃



位處元朗嘅好豆製研究所,門口以橙黃色為主,名字顧名思義係研製大豆類,主打就係豆乳飲品,廿幾款豆乳任揀,對選擇困難症嘅朋友係一大考驗。

小店專門製天然豆乳飲品,據悉以加拿大非基因改造大豆研磨,富植物蛋白質,加上日式傳統製漿手藝炮製豆乳,磨豆、煲煮,再隔渣,豆味更香濃,貿感更順滑,再調製唔同口味,然後以可循環再用透明小樽盛載,每支大概300ml左右,煞是可愛。

其中一款係黑豆豆乳 $28,豆乳入口清甜解渴,雖然有部份有分微糖同無糖,基本上糖份都唔高,黑豆製嘅豆乳味偏淡,但入口好順喉,豆味濃度甚高,新鮮製作兼無添加豆乳絕對抵飲。

另一杯只有少量嘅西瓜豆乳 $25,豆香較輕微,西瓜味好重,清爽西瓜甜味搶過豆乳味,適合夏天天氣炎熱時飲用。

與其拍拖用30幾蚊買茶飲,不如兩個人平10蚊買無添加嘅健康豆乳啦!

e.a.tips
(1)記住飲用之前一定要搖勻咗先,味道會較均勻。
(2)如果樽蓋無開,最多可以放入雪櫃放兩日。
(3)豆乳嘅小樽可以循環再用,樽底有標示幾耐要飲完同點存放,不過記得要擰實樽蓋,避免翻瀉。

好豆製研究所

地址﹕元朗鳳翔路63號金馬大廈地下12號舖
營業時間﹕12:00 – 21:00(星期一休息)

延伸閱讀﹕元朗平價蕃茄濃湯麵 $58連小食自由配搭

延伸閱讀﹕元朗正宗肉焿極滋味 歎古早味台式小食

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!