異國風小屋佈滿草牆恍如《IQ博士》天神村

抗疫未完，好多地方都未完全開放，唔少活動都有限制，足球場似乎都未解封，最好嘅活動似乎係四圍打卡影吓相，比較不受限制。今次發現一個大隱隱於市嘅打卡點，似足一間外國獨立小屋，環境有幾分似鳥山明漫畫作品《IQ博士》嘅天神村。

呢座建築物狀似一間小屋，位處大坑東遊樂場，外圍舖滿綠色植物，各種垂直植物形成三面密密麻麻嘅草牆，充滿綠化感。加上今時今日嘅草地已經長滿碧綠小草，畫面盡顯青青綠綠，更添異國氣氛。

從滿佈草牆嘅小屋，拍拖嚟到，兩個人可以隨意打卡，甚至可以作拍攝婚照用途，畫面絕對唯美，係一個比較少人去嘅打卡點。最意外嘅係，如此唯美嘅畫面，竟然來自一個蓄洪池！

大坑東蓄洪池曾經兩年前曾經以藝展方式開放予公眾，當時可以走入蓄洪池內，環境據聞有幾分恐怖，似足深不見底嘅防空洞。事實上，蓄洪池喺2004年落成，係渠務署最大型同第一個地下蓄水計劃，用嚟應付特大洪水，隱藏喺大坑東遊樂場內，相信唔少人去欖球場同足球場時，都估唔到會有一個長136米、闊130米、深9.5米嘅蓄洪池喺附近。