麵底紅紅綠綠 太子十六座車仔麵食得刁鑽

車仔麵區區都有，要突圍而出並非易事，太子十六座車仔麵由招牌到室內都充滿傳統風格，感覺一秒返回從前。

室內設計的確值得欣賞，裝潢十分傳統，連角落都係傳統設計，比如舊式筷子筒，要搜羅舊式小道具，話難唔難，話易唔易。

從餐牌所見，價錢相宜，車仔餸清一色9蚊或11蚊，兩餸一麵最平30蚊，三餸一麵最平39蚊，傳統車仔餸比較平，但呢間車仔麵似乎重點在於車仔餸夠刁鑽。

除咗傳統粉麵，俾多兩蚊仲有藜麥麵、紅菜頭麵、菠菜麵、蝦子麵，甚至日本乱切烏冬同本州刀麵，兩碗車仔麵一紅一綠，紅菜頭麵同菠菜麵顏色搶眼，而且夠晒健康，的確幾特別。

而車仔餸亦有好多唔係平時食車仔麵會食到嘅款式，最特別嘅限量金沙骨未必次次有，至於牛爽（牛舌芯）、騸牯爽滑牛肉或牛腩、五香蝴蝶腩、米糖鹵雞翼、鹵水牛脷或豬大腸等都係招牌車仔餸。牛爽亦係限量，好爽口，有少少輕脆感，騸牯牛腩夠軟腍，似牛筋腩，入口順滑唔會韌。

傳統車仔餸都好出色，豬紅粒粒滑溜，唔會一夾就散，蘿蔔無渣易入口，亦好入味，鹵水豆腐質感結實而滑溜，鹵得好香，辣魚蛋好有以前掃街嘅感覺，不過味道的確偏辣，唔太食得辣要注意。

e.a.tips （1）中辣湯底的確辣味好重，連Mr E好食得辣都覺得辣，如果唔太食得辣建議叫小辣，甚至鹵水汁或牛腩汁。 （2）抗疫期間，小店都有做足抗疫措施，包括用膠片分隔座位，保障衛生，亦會為客人量度體溫等。

延伸閱讀﹕異國風小屋佈滿草牆 恍如《IQ博士》天神村

十六座車仔麵

Δ 版權為E.A.Two 兩個人醫吓肚所有，歡迎轉貼連結，勿全篇文章轉載

Δ 如果覺得我哋嘅介紹啱睇，就Like吓我哋Facebook / Follow吓我哋Instagram啦！