小店向來比連鎖店值得支持，位於葵涌光輝圍小街道內，隱藏咗一間好有水準嘅上海菜，小籠包、擔擔麵、排骨、年糕、粗炒、醉雞、酸辣湯等款款傳統小菜都有，不單上枱熱辣辣，而且用料充足又入味，令人一試難忘。
必食嘅一定係龍川小籠包 $33/4隻，即叫即蒸，熱辣辣上枱，每隻都夠大粒，表皮唔會太乾，略有濕潤感，皮薄煙韌，只係最頂偏厚，夾落去唔容易穿，可以鎮住肉汁。小籠包配搭香醋好爽，一咬落去即有湯汁嗌出，肉質嫩滑，湯汁同醋融合，鮮甜肉汁同香醋酸甜味足夠，另湯汁較熱，要小心燙口。
午市麵底基本可配搭唔同湯底同小食，必食嘅有上海排骨麵，配搭酸辣湯底都係$50，酸辣湯極惹味，質感較黏稠，令麵底更容易掛湯，入口酸辣味豐富，調校得適中，唔會太淡，又唔會太酸或太辣到嗆鼻癢喉，反而好開胃醒神，有地道感覺。麵底方面值得一讚，將麵底滰乾水先放入酸辣湯底內，開頭乾到似糊，但原來係心思之一，咁做先令麵底唔會出水，避免食到底時湯底愈食愈稀。而上海排骨亦炸得有特色，無乜雪味，炸粉唔多，炸得輕脆，內裏仍嫩滑兼有肉汁。
而龍川上海粗炒 $53 份量好充足，味道相對較淡，炒得夠乾身，但醬汁唔太足夠，餡料都係偏淡，若加返多啲鹹香味會更好。然而，配搭適量辣椒醬一流，辣椒醬同粗炒拌勻後，味道辣中帶甜，又唔會太辣，需要配搭醬汁先惹味。
飲品必揀白豆漿同黑豆漿，兩個人拍拖去可以兩樣都試吓，不過黑豆漿係支裝攞貨居多，來自正遠荳品，係香港製造，豆味足而鮮甜，反而跟餐送嘅白豆漿比黑豆漿明顯幼滑，豆味濃郁，唔會太甜，味道較原始。留意到廚房內嘅白豆漿係用無招紙嘅樽盛載，白豆漿入口似係小店自己磨製嗰種豆漿，事實上豆漿自己磨製嘅成本更平，絕對不足為奇。
龍川上海料理
| 地址﹕ | 葵涌光輝圍21號昌發樓地下 |
| 營業時間﹕ | 11:00 – 22:00 |
| 電話﹕ | 3488 0083 |
在〈平凡中顯不平凡 葵涌小店上海菜有水準〉中有 5 則留言
留言功能已關閉。