[sp_html5video category=”1882″]
葵涌中心地下有一間隱藏喺馬路邊嘅咖哩飯專門店，價錢超平，但份量充足，一於豬牛雞都試一碗，每一碗飯都會附送一杯綠茶，下午茶最平嘅咖哩飯只係24蚊！
咖哩，譯音來自Curry，源自印度，咖哩係由好多種香料煮成，一般係醬汁狀，正宗印度咖哩味道偏辛辣，泰國菜亦好普遍，不過目前日式咖哩飯亦相當出名，而呢間隱藏喺葵涌中心地下、主打日式咖哩飯嘅小店，最大特色係平價兼大碗飯，但絕對唔係劣食，拍拖每人一碗飯，兩個人埋單可以唔使50蚊！
店舖面積較細，大概只係百零呎，小店只得老闆一個人，人手有限，堂食需要坐店外位置，堂食影相比較靚，只係衛生環境一般，靠近垃圾房，正對門口會見到垃圾……車經過，雖然小編係支持環保，不過抗疫期間建議以外賣自取方式，將咖哩飯買返屋企食。
店舖風景一般, 正對門口會見到垃圾……車行過
野菜咖哩蜜糖燒雞扒飯 $28 飯粒全部選用珍珠米，粒粒入口煙韌，飯量超多，白飯頂端仲有紫菜同芝麻作點綴，同時令飯粒有啖啖芝麻香。本來想試最平嘅野菜咖哩飯，但老闆表示無晒野菜，所以轉為另一碟。咖哩汁都好夠香，咖哩唔辣，好易入口。雞扒表皮超香，醃完再煎過先舖上飯，肉質白滑軟嫩，不過多啲咖哩汁撈飯會更好。
日式薯仔燉豬軟骨飯 $28 雖然主打係咖哩飯，不過小編共同投選最美味嘅係燉豬軟骨飯，豬軟骨燉煮得入味，肉質勁軟腍，軟骨爽口，入口較清淡柔嫩，連配菜紅蘿蔔都軟淋淋，燉煮出嚟嘅汁比調校出嚟嘅醬汁更有心機！
日式蕃茄牛肋條飯 $34 蕃茄汁向來係食物嘅保證，蕃茄醬汁撈飯絕對惹味，鮮蕃茄好香甜，酸酸甜甜好開胃，不過蕃茄表皮微鹹，而醬汁食到底亦有少少偏鹹。而牛肋條有咬口，牛味濃郁，筋位同纖維較多，雖然嘴嚼比較耐。
| e.a.tips （1）抗疫期間建議外賣自取，減低留喺街上除低口罩嘅時間。 （2）盡量避免中午食飯時間去，避開人流，建議等14:30下午茶時間，價錢更平，份量亦唔少。 |
延伸閱讀﹕葵涌良心小店 工業區驚喜咖啡
延伸閱讀﹕平凡中顯不平凡 葵涌小店上海菜有水準
野菜咖喱事務所 Curry Man
| 地址﹕ | 葵涌葵興道100號葵涌中心商場地下A42號舖 |
| 營業時間﹕ | 星期一至六 11:00 – 21:00；星期日全日休息 |
| 電話﹕ | 5112 8914 |
店舖於葵興站附近葵涌中心樓梯底下
在〈葵涌中心馬路邊百呎微舖 大大碗咖哩飯最平24蚊！〉中有 5 則留言
留言功能已關閉。