深水埗網紅小店最平29蚊套餐 除咗牛丸仲有咩食？

開業一年半，由講開時事同兩性關係嘅網絡紅人Youtuber伍仔踩過界開設嘅金芝龍日韓美食外賣站，選址深水埗鬧市，主打日韓料理同街頭小食，創意十足，個個都食嘅係牛丸，據悉採用和牛製作，牛味濃郁之餘，特別有肉汁。不過，個個都食牛丸，到底除咗牛丸，有無其他嘢好食？

小店門面顏色鮮艷，裝潢以黃色貨櫃鐵閘為主，絕對唔難搵，事實上除咗招牌牛丸，仲有丼飯、烏冬、炸物、年糕等輕食，明顯想吸納年輕客人。有人覺得外賣店嚟講每份價錢偏貴，亦有人覺得29蚊一個迷你套餐已經好抵食，應該係窮人拍拖之選。另外，店內雖然主打外賣，但亦有少量座位可供兩個人至四個人堂食。

期間限定丼飯有A級鰻魚飯 $58，鰻魚、飯量份量均充足，鰻魚表面灑有木魚碎、芝麻，帶有鹹香味同芝麻香，鰻魚魚肉軟嫩，唔算原條，但已經比超級市場大條，鰻魚醬汁夠濃味同黏稠，但略嫌醬汁較少。飯粒雖炒得均勻，亦有椰菜點綴，增加爽脆感，但質感未夠乾爽，反而帶有幾分黏稠感。

而韓式芝士年糕拉麵 $48 有微微驚喜，拉麵爽滑彈牙，芝士年糕煙煙韌韌，軟身有咬口，而且幾香口，僅有輕微芝士味，唔會太膩。不過，其實呢款菜式唔太適合做外賣，做得外賣店應該照顧埋外賣返去嘅情況，打開蓋嘅時候，芝士年糕拉麵份量雖然多，但變成一餅嘢，整體硬晒。

餐飲每杯都幾大杯，仲印有香港加油嘅標記，杯杯都夠冰凍。奶茶味道稍淡，奶味較香，適合唔太嗜甜嘅朋友。而冬瓜檸檬亦唔會滿口糖水感，的確有微微冬瓜味，不過不失。

e.a.tips （1）如果落單講聲香港人加油嘅話，全單可享減5蚊優惠。

延伸閱讀﹕番茄師兄炮製足料蕃茄湯 酸酸甜甜勁開胃

延伸閱讀﹕深水埗臻.茶限時優惠低至7折 牛油果系列勁爽甜

金芝龍日韓美食外賣站

Δ 版權為E.A.Two 兩個人醫吓肚所有，歡迎轉貼連結，勿全篇文章轉載

Δ 如果覺得我哋嘅介紹啱睇，就Like吓我哋Facebook / Follow吓我哋Instagram啦！