疫情仍未穩定,幾時可以去旅行都係未知之數,暫時都係留喺香港啦!事實上,香港18區都有好多值得遊覽嘅地方,既可以食吓嘢,又可以影吓相,今次自遊區第一站帶大家去到樂富。
自遊區每次會帶大家輕鬆遊覽一個香港小區域,每一區都曾經有自由,香港人理應可以自由遊覽香港每一處地方,細心留意會發現有好多值得去嘅地方,小區好去處即刻同你睇睇!
樂富基本屬於黃大仙區內一個小區,曾經係老虎岩徙置區,有傳以前老虎岩有個山頭岩洞,有老虎喺此區出沒,所以喺60、70年代就叫老虎岩,後來政府以老虎諧音樂富將小區易名,有安樂同富足之意。但樂富公園又被劃入去九龍城區,整個小區位處獅子山山腳,並以公共屋邨樂富邨為中心。
樂富有咩食?要喺呢區搵一間良心小店唔容易,全區最大嘅商場就係樂富廣場,商場內就有一間海鮮西餐廳,店外以黃色為主調,店內更黃到入心,同大家STAND WITH HONG KONG,環境清靜,最啱拍拖短聚。兩個人食兩個餐都係百零蚊,價錢合理,食物亦有質素。
特別推介白鱈魚漢堡伴自家製他他醬配薯條,漢堡大舊又足料,麵包鬆軟,內餡為脆炸白鱈魚,漢堡包入口外軟內脆,魚肉嫩滑,自家製嘅他他醬似沙律醬,酸甜味清新又開胃,薯條連皮炸有好重薯香味,入口唔算油膩。
延伸閱讀﹕由外黃到內 樂富廣場平民西餐廳最啱撐枱腳
食飽飽當然要搵地方散吓步,樂富鮮有可以行嘅地方,唔計室內倒模式商場,基本比較少地方可以散步,摩士公園係其中一個可以散步嘅地方。除咗摩士公園,其實樂富公園亦內藏一處特別嘅小山丘。
樂富公園內有一座有香港歷史價值嘅格仔山,雖然天氣日漸炎熱,但格仔山海拔僅高98米,靠近樂富配水庫休憩花園,絕對係一座唔會令人爆汗嘅小山。事實上,格仔山曾經係啟德機場13跑道降落航道必經之處,髹上紅白格仔圖案,以便機師導航,故被稱為格仔山。目前已被髹返灰色兼種樹,係有幾分懷舊味道。
從格仔山俯視,會見到九龍仔公園,左邊為九龍城,右邊為九龍塘,輕鬆上山即可居高臨下欣賞山下景色。不過,上山小路狹窄,而且山邊鐵絲網被損毀,有一定危險度,打卡時要特別注意安全。