土瓜灣向來係一個舊區，以工業區同住宅區為主，休憩地方只得海旁位置，海旁附近有一顆大有來頭嘅怪石，盡頭仲有隱藏咗一道超浪漫嘅粉紅橋，小橋延伸係一個粉紅色小涼亭，位處海面，微風吹拂下，環境其實幾Chill！
位於土瓜灣嘅海心公園，座落落山道，靠近海旁，原本係一個叫海心島嘅小島，以漁民為主，本來有海心廟、海心亭等，以前被稱為土瓜灣島。島上有唔少形狀奇異嘅怪石，突兀又嶙峋，當中最特別嘅係魚尾石，另有海心石，而魚尾石目前仍然座落海心公園之內。魚尾石係50至60年代拍拖情侶慕名而睇嘅著名景點，屬一塊奇特石頭，望落似足插水中嘅魚尾，據悉係著名風水地，目前可以喺樹下觀賞充滿歷史價值嘅怪石，至於海心石既可談心，拜完海心石亦可期望有美好姻緣。
海心島因填海而變成土瓜灣區內陸地相連嘅土地，目前去唔到旅行，想以零入場費拍攝靚景，公園一樣可以係休閒打卡好地方。
行到海心公園盡頭，即可見到海心亭，由一道夢幻粉紅小橋連接嘅海心亭帶有幾分浪漫感，位置既可望九龍東、紅磡灣，亦可望維多利亞港，甚至港島北角區，景觀遼闊。
毗連海心公園，係一條海濱長廊，可以繼續沿路行海濱公園，會到達九龍城碼頭、馬頭角公眾碼頭，喺喧鬧城市中感受片刻寧靜。
延伸閱讀﹕土瓜灣藝術村 齋Hea好去處
E.A.Tips﹕
（1）海心公園涼亭聚集咗一堆公園阿伯，疫情期間有部份無戴口罩，最好保持至少六個階磚距離，更安全嘅做法係等疫情過咗先去打卡啦！
（2）岩石區不對外開放，有一定危險度，記得唔好攀爬上魚尾石。
海心公園 / 魚尾石
土瓜灣旭日街
05:30–23:30
2334 3576
在〈土瓜灣小公園涼亭延伸出海 神秘浪漫粉紅橋打卡〉中有 8 則留言
留言功能已關閉。