香港文青Cafe愈開愈多，要可以打卡又係良心店之餘，又有特別之處，土瓜灣舊區有一間以都市空間命名嘅咖啡店，既係咖啡店嘅同時，亦係書店，可以一邊飲咖啡，一邊抱書閱覽，絕對係啡好飲、書好睇、店好靜，本土味極濃！最啱作拍拖消閒節目，兩個人食完Brunch可以睇書休息一下，人情味非連鎖店可以提供，周末不妨去享受舊區內街一片心靈淨土。
土瓜灣令人感覺自成一角，從天際線望到舊區最多舊物、舊屋同舊人，每道隙縫都恍惚傳出舊時色彩，區內比較少新咖啡店。而呢間以書店crossover咖啡店嘅餐廳開業逾一年，據悉僅由兩母女打理，室內裝潢簡潔，大概平均劃分成三等分，開放式廚房、咖啡店用餐位置、書架藏書位置一目了然，可隨時同朋友以書相聚，愛書嘅朋友可以隨時去尋寶，室內寂靜氣氛同土瓜灣道嘅大街道成反比，恍惚穿越到第二度空間。
歎返個焗芝士雞肉酥批配南瓜湯、沙律菜 $95，製作需時15mins，南瓜湯含南瓜蓉，熱辣辣，質感creamy，雞批好高質，內餡有雞肉碎之餘，仲有芝士軟心，批皮微微酥脆，唔會太油膩，餡料有層次。
因為想飽肚啲，所以小編叫多個蕃茄湯牛肉烏冬 $55，可轉湯飯，為即煮蕃茄蔬菜湯底，唔算好高水準，但有家庭式感覺，烏冬滑溜彈牙，肉片份量唔多，啖啖肉但似茶記沙嗲牛通質素，雖然好欣賞無味精，但食到好重類似胡椒粉同香料味，蓋過蕃茄香同酸甜味。
木書架上藏書量豐富，陳列出一本又一本精巧書籍，每本都可供購買，並於店內閱讀，書本中有唔少書本同目前香港社會事件大有關係，甚至擺放當眼位置，可見店主係關心香港之人。除咗新書，亦有部份二手書籍，給予愛書之人更多選擇。
天花以展翅中嘅書籍點綴，牆壁亦有電影海報、畫作，更顯文雅感覺，而室內燈光明亮，方便客人可以坐低咖啡店內慢慢細閱書本，亦可以一邊細味書本字句，一邊歎杯咖啡或特色飲品，甚至醫吓肚。坐低細味書籍，聽到嘅只係開放式廚房內煮食洗碗交疊嘅聲音、甚至旁邊客人利用手提電腦工作嘅鍵盤打字聲，寧靜空間似乎減慢節奏，阻止時光飛逝，有種日系咖啡店嘅感覺。
坐咖啡店歎返杯Cappuccino +$24是常識吧？咖啡有水準，奶香比咖啡香重，歎啡絕對係睇書最佳配搭。另外，試咗一杯好特別嘅覆盆子紅醋奶昔 $35，飲品採用環保飲管，紅醋味極濃，隱約夾雜有奶味，不過Raspberry味比紅醋蓋過，第一啖入口極刺激，其後順滑比較容易接受。
延伸閱讀﹕土瓜灣藝術村 齋Hea好去處
E.A.Tips﹕
（1）先點餐，後結賬，小店只收Cash。
（2）餐廳為一間咖啡店連書店，記得保持安靜，放輕聲量講嘢。
（3）周末假日用餐時間限時90分鐘，但平日就無限制。
（4）店內嘅書記得俾錢買咗先好拎返埋位睇，未俾錢唔好埋位睇啦！
（5）土瓜灣道任何一架巴士路線都可抵達，由土瓜灣道轉入貴州街或落山道即可轉入美景街。
都市空間 Urban Space
土瓜灣美景街45號地下
星期一至三 12:00 – 21:00、星期四全日休息、星期五至六 12:00 – 21:00、星期日14:00 – 21:00
2522 6300
在〈土瓜灣書店連文青Cafe 穿越舊區第二度都市空間〉中有 6 則留言
留言功能已關閉。