位處九龍城嘅茶飲店玖捌，比一般茶飲店特別，既係寵物友善餐廳，亦係一間小型Cafe。平時買茶飲都只能喺街上飲，但今次買茶飲可以喺室內飲完先走，價錢雖然比一般茶飲貴，但環境比較好，加上扣除優惠後每杯價錢都係同平時差唔多。
據了解，玖捌有久別重逢嘅意思，英文名同樣簡單以Nine Eight命名，只要唔加數目字6號，整個數字就順眼得多。久別重逢有懷舊感，所以茶飲都以懷舊為主，包括格仔餅、鳳仙、玄米杏霜等，都係懷舊小食。茶飲店開得太濫，黑糖珍珠奶茶飲到悶，要突圍當然要靠少少Gimmick，糅合懷舊、創新的確可以帶出驚喜。
地道飲品如檸茶、奶茶、奶昔等當然有，招牌特飲要數格仔餅 $52，以經典港式小食格仔餅為藍本，甚驚喜。表面灑上香脆糖蔥，配上椰絲，對比強烈，加上花生醬香，配合椰子奶，味道鹹中帶甜，簡直神還原格仔餅！杯上仲將花生醬演變出似黑糖嘅虎紋，脆脆糖蔥加花生碎，懷舊中帶有摩登感。
另一招牌特飲係玖捌 $52，屬芝麻系列茶飲，似足芝麻糊味奶茶，芝麻香配搭紅茶清香，表面有黑芝麻點綴，加上黑芝麻忌廉泡沫，紅茶香味同黑芝麻味融合，平衡得到，而茶底就夠濃郁，整體唔會太甜，同時有椰奶香味，啖啖入口順滑清香。
室內以藍綠色為主調，感覺和諧，有少量木枱、座位，可以坐低歎返個下午茶，背後塗鴉牆牆身原來有重逢字樣，呼應店名玖捌，幾有意思。加上店內採用環保紙飲管，仲有寵物擺設，帶同寵物時亦可以將寵物狗帶扣於餐枱底嘅枱勾，相當方便。
除咗茶飲，仲有唔少蛋糕仔、馬卡龍、自家製布甸、軟雪糕可擇，顏色鮮艷，非常吸睛，打卡一流。如果兩個人每人一杯茶飲配一件蛋糕，已經可以拍拖坐低慢慢歎返一份下午茶啦！
E.A.Tips﹕
（1）抗疫期間，每兩杯有8折優惠；本身醫護同學氐都有9折優惠。
（2）最好叫少甜，本身都已經略有甜味。
（3）店舖招牌有幾分似殖民時代嘅皇冠，設計似舊時硬幣，幾特別，可以留意吓。
玖捌
九龍城太子道西368-374號龍珠樓地下19號舖
星期一至四 11:00 – 19:00；星期五至日、公眾假期 11:00 – 19:30；公眾假期前夕11:00 – 19:00
2505 6098
在〈九龍城玖捌非一般茶飲店 坐低歎懷舊港式下午茶〉中有 2 則留言
留言功能已關閉。