馬灣打卡

馬灣舊村丟空多年零發展 廢棄村落探險頹廢風滿滿

[sig_post_pv label=””] 個人瀏覽過



馬灣係一個並無私家車到達嘅小島,出入靠巴士專線,走入馬灣有幾分異國感,目前搭唔到飛機就搵半日行吓馬灣,當拍拖去個小旅行啦。馬灣廢村幾年嚟係唔少人遊覽之地,最啱拍攝充滿頹廢風嘅靚相,唔少偽文青們都會去打吓卡,但馬灣廢村收地至今丟空咗幾耐無發展過有幾多人知?如果真係發展成商業、旅遊或住宅用地,到底又係咪好事?

市中心只有基本日常需要購物地方,並無多餘商舖,亦只有少量餐廳。由馬灣市區行到香港三級歷史建築芳園書室,係一所建造已達90年嘅學校,直到2003年先停辦,2013年活化後演變為區內博物館,目前由政府管理。芳園書室以古典建築設計,原以白色為主調,包括白色水泥牆、白色柱、白色扶欄,故被稱為白樓,惟白樓經歷練後開始有殘舊感,中央招牌灰塑字圖案同左右牆身都佈滿灰塵,充滿歷史痕跡。書室樓高2層,入口以拱門設計,上層有露台,前門有被矮磚圍牆包圍嘅小花園,不過室內暫時唔開放。據了解,書室上層可望青馬大橋景觀。

經背後小路可以步行到馬灣舊村落位置,小路本身雖然係石屎路,但兩旁都係廢棄空間,有部份係樹林,已經有幾分探險感。即使係日光時份,舊村道路兩旁都係廢棄空間,一片頹垣敗瓦,都有啲陰森恐怖,陰暗嘅舊村同光猛嘅新村大有分別。每間小平房都殘舊不堪,外牆漆油逐漸剝落,窗框亦變陳舊,漸漸生鏽,滿佈鏽跡,甚至可見鋼筋,部份外牆仲有雜草延伸出嚟,陰風陣陣,好有廢墟探險嘅感覺。馬灣大街則靠近海旁,廢棄物、垃圾、爛船都清晰可見,行到近碼頭仲有一間天后古廟,而碼頭不時有釣魚客垂釣,從馬灣公眾碼頭可超近距離望汲水門大橋,景觀遼闊。不過,當陽光照射到馬灣廢村時,陰森感無咁重,環境反而好有電影感,兩個人影相打卡一流。

馬灣舊村幾年來被稱為馬灣廢村,原本居住舊村嘅村民被安置到隔離嘅新村,都係收地賠償俾村民,亦有部份釘子戶反對收地。翻查資料,馬灣舊村本來被收地作發展海岸作旅遊康樂用途,至今4年依舊未有任何發展,有指因有住戶未有遷出而未有動工,維持廢棄村落。馬灣舊村原為該區第二期發展,目前馬灣舊村零發展,近百間村屋已丟空成廢村,因地政總署拖延收地而將現有土地同村屋廢棄,既不能翻新舊村,亦不能使用,變相丟空。不過,現時馬灣舊村雖然廢棄,但途人可以自由穿梭其中,未被發展成旅遊康樂用地,唔會太多遊客進入,亦唔會因翻新而塵土飛揚,舊村民亦可保留回憶,唔發展係咪好事就真係難以判斷。

由碼頭折返到馬灣東灣泳灘,沙灘本身人流唔多,疫情期間禁止使用,人流更少,從沙灘處可近距離望青馬大橋,亦可遠眺馬灣海峽,沙灘旁邊仲有婚禮場地同高級餐廳,沙灘不單係拍拖情侶散步好地方,亦係準夫妻嘅婚攝熱門地,另一邊有一間非同路人嘅渡假酒店,玩樂都需要購票入場。

延伸閱讀 : 馬灣異國風情 近距離睇青馬橋 爽歎希臘菜

延伸閱讀 : 從油麻地搬入馬灣 私房菜變街坊店 隱藏Cafe大玩熱沙咖啡

延伸閱讀 : 小島米線街坊店 必試一款秘製小食

E.A.Tips﹕

(1)馬灣珀麗灣有巴士專線往來葵芳、青衣,分別可乘搭NR332、NR330,荃灣亦有331專車,另亦可由中環碼頭乘搭渡輪到珀麗灣碼頭,經東灣泳灘就到馬灣公園。

(2)打卡還打卡,請唔好影響其他人,唔好騷擾新舊村居民。

(3)只需沿救世軍馬灣青年營指示牌行,就可輕易經過馬灣舊村位置。

(4)大部份廢村屋外都有鐵欄圍繞,但部份無鐵欄,不建議入內探險。

馬灣舊村中華電力馬灣舊變電站

馬灣大街38號號天后古廟

芳園書室

田寮村馬灣鄉事會路

馬灣公眾碼頭

馬灣大街村

馬灣東灣泳灘

馬灣馬灣路

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!