經濟型情侶收藏觀塘零打卡位法餐穿越普羅旺斯歎足2小時

平時文青Cafe去得多，想試吓其他類型嘅餐廳，喺觀塘APM商場附近發現一間法國菜餐廳，上年曾由藝人杜汶澤加持過，價錢唔算太貴，適合慶祝紀念日，與其20個人去酒店逼埋一間房屈蛇，俾幾千蚊玩Staycation打個卡，不如約埋三五知己小聚食返餐好啲重好啦！

位處觀塘工業區樓上舖嘅普羅旺斯餐廳，主打法國菜，翻查資料時睇到上年先開業，門口亦有一小張餐廳同主廚介紹，提到主廚曾長居法國普羅旺斯，炮製正宗法國菜，成為法式小廚，並將各種烹飪技巧傳授拍檔。以店主、店員熱情招呼同主動介紹各款菜式同進食方法，確保客人進食方法正確，唔會太拘謹，好有誠意，令身為客人嘅小編感覺受到尊重，所以相關資料非常充足。室內雖環境清靜，燈光柔和，但裝潢唔太特別，比較簡約，網紅們未必會去，因為無影相位，同Fine Dining嘅餐廳有分別，店主表示希望客人係欣賞食物，並非純粹打吓卡。

食材上感覺走高檔路線，服務亦似法國餐廳質素，大廚的確幾有功架，有驚喜，菜式上有一秒穿越法國普羅旺斯嘅感覺，不過食法國餐播廣東歌即刻一秒出戲！

Lunch Set包含意大利沙律同蘑菇湯，沙律伴有微鹹嘅Salami 莎樂美腸、香甜嘅蜜瓜，重有大廚自己醃櫻桃蘿蔔仔，入口酸甜，唔會好濃味，幾開胃。而蘑菇湯亦好足料，一碗湯包含3種菇菌類、麥藜同Cream，湯雖然可叫店員加胡椒，但小編唔建議加，因為原味已經夠香滑濃稠。蒜蓉包就外脆內軟，法式麵包表皮雖然脆口，但內裏好軟熟，牛油、蒜蓉平均分佈麵包表面，有足夠蒜香味。

前菜加$28可試吓冰鎮荔枝浸蕃茄，蕃茄仔Size似車厘茄，真係法國菜份量咁的骰。蕃茄浸泡荔枝汁內，必須按次序食，將蕃茄擺入口，然後飲埋小碗內嘅荔枝汁，一啖食晒佢！冰涼鮮蕃茄同荔枝汁互相融合，味蕾會感覺到蕃茄酸甜同荔枝汁香甜味輪流交替，咀嚼時甜中帶酸，感覺好Fresh，最後薄荷葉再滲透出微微清涼感，口腔會有Refresh感覺，夠醒胃，夏天食應該會比較會有消暑感。

另一道前菜加$88可以試埋北海道帶子，屬輕微炙燒嘅刺身冷盤，帶子表面有少量蛋白，店員介紹時指蛋白係大廚自己打，目的希望香滑同Creamy啲。蛋白旁邊有一小堆貌似魚子嘅Wasabi，有幾分似分子料理。帶子底部有帶酸甜味嘅茴香檸檬蜂蜜汁，醬汁清爽而唔算甜膩，帶子肥美鮮甜，配合軟滑蛋白泡沫同微辣唔嗆鼻嘅Wasabi粒粒，層次幾豐富。

主菜有法式香蛋厚燒西班牙黑毛豬鞍 $258/set，店員上枱時介紹黑毛豬係食全醬果，所以好有肉香，加上大廚煎黑毛豬鞍時同時將煎蛋置於表面，令表面有一層薄薄蛋面，蛋香融入黑毛豬鞍內，當中夾雜肉香同微微油香，煎蛋要煎得靚唔容易，重要薄層，好考大廚功架。蛋全熟而黑毛豬鞍略有粉紅色，見到豬肉有微微粉嫩同貌似未熟透有少少怕，但店員上枱時主動表示煮法正常，黑毛豬鞍屬安全狀態。黑毛豬鞍略有火喉，同平時慢煮版有分別，表層蒜蛋焦香微脆，底層肉質腍滑，唔老，入口Juicy，整舊好厚身。黑毛豬鞍旁邊配上香橙醬同黑毛豬醬，前者帶酸甜味，後者則鹹中帶甜。

另一款主菜係法式油封鴨腿配桂花蜜茸啤梨 $298/set，因為好耐無食過真油封鴨髀，店員介紹話好落本地用法國髀，而唔係中國髀，油封鴨髀係煎完再炸，再焗一焗，令鴨髀熱辣辣上枱，再淋上桂花蜜茸啤梨汁，好似有微微荔枝香味。油封鴨髀表皮微脆，略帶油脂香，唔會太肥膩，內層鴨肉鬆化，加上有啲西式配料醃製調味。而醬汁就包含啤梨汁，清新感亦石中和鴨髀肉油香感，配菜就選擇冰凍蜜桃，亦幾香甜清爽，好解膩。

配菜亦幾有心思，有意大利青瓜、翠玉瓜、紅蘿蔔、茄子、薯仔，淋有用蕃茄煮嘅醬汁，小編知識有限，呢樣需詢問店員先知道係一款普羅旺斯燉菜，用錫紙包住嚟煮。

套餐飲品有Shake shake檸檬茶，同平時凍檸茶係有少少分別，店員稱係每日餐廳都會煲煮紅茶，茶底夠香夠濃，除咗檸檬同青檸汁，亦加入有檸檬皮上嘅檸檬油，有小清新感。雙檸入口有更重酸味，夏天飲夠晒清爽，但建議檸檬茶要攪勻先飲，茶膽似乎有少少澀味。

另一杯加$25就試試Honey moon 蜜月，採用檸檬、青檸、青桔仔，再加上蜜糖，可滋潤吓。熱飲嚟，入口暖笠笠，呷入口酸甜味突出，大概係青桔仔帶出柑橘味，青檸比一般情況溫和咗，無咁酸苦，略帶清香。將檸檬、青檸同青桔仔混合，整體好清爽，而加入蜜糖後就滋潤溫和，唔會過甜或太Dry。

其中一款甜品係法式蘋果撻，但需加$118，要影相就要同時間競賽。蘋果撻層層酥脆，置於碟上睇落好薄身，有幾層，當中有一塊又一塊手切蘋果烤焗完變薄脆，同時大廚會確保無氧化情況，會即叫即整，而且希望客人盡快食，唔好浪費。蘋果有微微酸香感，香甜而脆口，表面曬有玉桂粉，但唔搶味。而蘋果撻表面亦置有一球雲呢嗱雪糕球，令甜品冷熱共融，非常特別。

E.A.Tips﹕
（1）店舖門口寫明只收Cash，無電子支付，所以要帶夠Cash先去食，不過留下地下已經有銀行同ATM，尚算方便。
（2）店主提醒最好先預約，因為室內座位唔算多，預約可確保有位，餐廳不時有折扣優惠，最近Openrice訂座則有9折優惠，頭盤同甜品亦分別有65折同75折優惠。
（3）晚餐雖然氣氛會更好，但一般午市套餐價錢比較化算，適合小資生活嘅朋友間中食餐豐富少少。價錢上只係比平時嘅Cafe貴少少，但食物水準有保證，可由前菜、主菜食到甜品，兩個人平均每人約$400至$500，有可能係觀塘最貴嘅餐廳，但視乎揀食乜，乜都唔加就可以$198至$298埋單，另有加一服務費。
（4）只需由觀塘亞太中心門口直入，門口兩旁係銀行，可乘搭電梯或手扶梯上3樓，位置喺手扶梯旁邊。
（5）周末係比較好嘅選擇，最好預留充足時間，同快餐唔一樣，每樣會慢慢上枱，唔需要食得好急，食一餐需要2至3小時，適合拍拖或結婚週年紀念日等日子。

延伸閱讀﹕觀塘工業區歎$198夏午茶叫甜品免費幫你畫最愛卡通公仔

延伸閱讀﹕觀塘工廈平民丼飯甲羅燒蟹膏勁飽滿