[sig_post_pv label=””] 個人瀏覽過
粉嶺聯和墟食店多多，到底揀咩好？要支持良心店，又要食平價菜，仲有略有質素，呢間主打泰國菜嘅街坊小店就係佼佼者，去唔到旅行唯有食吓國外菜式先啦。
室內裝潢似足大排檔，又有木圓枱同摺櫈，牆上有唔少泰式壁畫，都算係打卡able，以懷舊設計，添加唔少復古道具，有啲似泰國餐廳crossover港式冰室嘅感覺。餐廳人流唔少，以街坊同拍拖情侶為主，唔少客人都係兩個人去食呢間平價泰式美食，各款湯粉飯每碗都係由$40至$45任揀，小食亦只係介乎$25至$32。菜式驟眼睇唔太特別，但食落就知性價比幾高，確實有驚喜。
必食嘅當然係牛湯粉 $40，湯頭好濃郁，顏色略深，濃厚得嚟唔係死鹹味，亦唔會好重香料味，泰式船河湯底真係有牛味，真係會忍唔住飲埋啲湯，仲有微量蔥花、炸蒜，略帶層次之餘亦有蔥香、蒜香。河粉滑溜，比平常港式河粉幼身，而且能夠吸收湯汁，夠掛湯。牛湯粉重點當然係牛啦，既有牛腩，又有牛柏葉、牛丸，通通都炆得軟嫩，牛柏葉有咬口，牛腩就勁索湯，可以唔需要再自行添加調味料，添加魚露、辣樣、豉油、砂糖會影響湯頭原味。
餐廳除咗主打粉麵，仲有就係碟頭飯，包括泰式燒豬頸肉飯 $42，燒得香口嘅泰式豬頸肉好惹味，熱辣辣最好趁熱食，泰式醬汁配搭燒豬頸肉好合適，醬汁帶酸甜味，甜中帶酸，幾開胃，醬汁完全唔辣，唔食辣都可以放心享用。豬頸肉幾大塊，但唔算得上厚切，基本唔算太肥膩，可以入口，蘸醬汁再配搭白飯可填飽肚。
青檸梳打 $18 就簡單以青檸配上梳打水，自行倒入，入口好Fresh，比較適合配搭重味嘢。而泰式奶茶 $18 嘅茶膽大概係採用泰國手標茶嘅紅茶底，同真泰式奶茶好相似，都係甜味十足，加上廚房一旁睇到有泰國手標茶葉嘅小罐，就更肯定。奶茶茶味香濃，奶夠幼滑，奶香茶濃，但甜味更重。
E.A.Tips﹕
（1）下午茶時段比較少人，最好避開食飯時間，唔使等咁耐位。
（2）兩個人人均大概$50，餐牌菜式唔算多，好簡單，適合選擇困難症嘅朋友。
延伸閱讀﹕蝴蝶山有蝴蝶？ 晨運路線眺新界北風景
延伸閱讀﹕粉嶺神秘壁畫村 每個角落都有藝術感
雄泰
粉嶺和泰街21號地舖 
11:30 – 22:00 
2668 0348
在〈粉嶺聯和墟平價泰國菜 必食超濃船河湯底牛湯粉〉中有 9 則留言
留言功能已關閉。