CoCo Espresso

CoCo Espresso登陸九龍灣 罕見氮氣咖啡綿密有餘韻



早前CoCo Espresso正式登陸九龍灣,Grand Open後為九龍灣返工嘅朋友帶嚟多一間良心店!目前,九龍灣分店已經係CoCo Espresso喺香港13年嚟嘅第6間分店,據悉更特別採用意大利頂級商用咖啡機Faema品牌,推出精品咖啡,仲有最新潮嘅氮氣咖啡,為拍拖情侶提供一個歎啡好去處!

今次九龍灣分店為一間Takeaway Coffee店舖,專注售賣咖啡,以意式咖啡、手沖咖啡為主,更以Tap Cold Brew為新概念炮製咖啡豆,令單品咖啡呈現原始味道俾一眾咖啡迷。室內無座位提供,只有少量高枱可以擺擺咖啡,兩個人可以同時打卡上IG,又可以歎杯精品咖啡。

先揀一杯Hand Drip $60,味道比較傳統,咖啡味夠清新,店員提到有2種咖啡豆可供選擇,嘗試咗Ethiopa Guji嘅Washed水洗咖啡豆。手沖咖啡萃取後感覺好清,貿感順滑,入口偏酸,好彩唔係尖酸味,係咖啡原始嘅味道,唔係烘焙好勁嘅咖啡味,咖啡略帶有甘香味,唔算太苦澀,咖啡僅略略醇厚,餘香唔太重。

另一杯推介嘅係Nitro Coffee $58,即氮氣咖啡,亦被稱為Nitro Cold Brew,係近年興起嘅獨特咖啡品種,今次CoCo Espresso可以挑選fruity或nutty口味,最終揀咗fruity啲,不過果香唔太重,咖啡味比較搶。以冷凍萃取方法炮製嘅咖啡,Cold Brew冷泡咖啡下,保留Nitrogen液態氮,加上tap,形成Nitro Cold Brew,為咖啡保鮮之餘亦可防氧化,成為氮氣咖啡。氮氣產生氣泡,令入口綿密細緻,味道濃郁,夠晒新奇有趣!不過,呷一口就會知道Nitro Coffee比手沖咖啡更酸,味道更苦,但有回甘味,咖啡味好持久,而且有餘韻。氮氣咖啡感覺比Espresso更濃,細微氣泡睇落似汽水,綿密幼滑質感嘅泡沫似黑啤,苦澀味則似齋啡,單品咖啡嚟講的確好特別,呈現最原始嘅感覺。

延伸閱讀﹕慢活歎Brunch 南豐紗廠小店撐本地品牌手沖咖啡

E.A.Tips﹕

(1)一般咖啡價錢約$34至$39,不過想試Special Drinks建議一嘗Nitro Coffee或Espresso Tonic。

(2)用eCup App買咖啡可以儲印花,儲滿10個印花可當$35使用。

(3)店內同時有咖啡豆、咖啡杯、咖啡機等售賣,咖啡豆產地有2至3種,可以買返去自己沖咖啡都得。

(4)事實上,一杯氮氣咖啡大概只係有5卡路里,減肥中嘅朋友都唔需要擔心會致肥呢!

CoCo Espresso

九龍灣常悅道21號The Eastmark地下4號舖
星期一至五 08:00 – 18:00;星期六及日 09:00 – 18:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!