舂坎角炮台

與赤柱繁華成對比 舂坎角炮台環境靜謐 探射燈座似海景大電視



赤柱係唔少外國遊客同本地人嘅熱門景點,但人流往往比較多,要避開人群,不妨兜遠少少,行去西面嘅舂坎角,既有炮台打卡,又可睇遼闊海景,環境清靜,適合兩個人短遊。

舂坎角位處港島南赤柱海角,被赤柱灣、舂坎灣包圍,附近都係低密度住宅,經過海灘,行到盡頭可達舂坎角炮台,吹吹海風都幾寫意。舂坎角炮台歷史悠久,明朝已有紀錄,亦係英軍軍事古蹟地點,後來建為郊遊地點。30年代末,英國為加強香港島防衛措施,喺舂坎角加建炮台,成為二戰時重要防衛基地,防日軍由南方水路登陸香港島。

由赤柱大街、赤柱廣場,經過卜公碼頭,可以行到赤柱馬坑公園,穿過赤柱馬坑公園,沿路即可以去到舂坎角公園、炮台。赤柱馬坑公園空間唔算大,毗連馬坑邨小山丘,但都有嘢睇,先可沿小路去探訪清朝已有嘅北帝古廟,返回路段會有少量樓梯,沿路行幾分鐘後,向下行可以去到小沙灘,但只適合散步,再繼續向舂坎角方向行,可直出迴旋處。舂坎角道中段位置其實都有唔少頹廢風嘅影相位,似碉堡。而同赤柱大街嘅繁華喧鬧相比,舂坎角清幽怡人,比較適合情侶拍拖談心。

沿舂坎角道行,甚至可遠眺海洋公園同南朗山方向,舂坎角道盡頭會見到一個白色主調嘅半球形狀炮台,由於路程甚遙遠,基本上屬於比較少人會行到嘅地方。炮台原為湖水綠色,不過飽歷風霜後,目前已盡褪色,變成白色,淨低少少石枱、石櫈。從炮台位置石享無敵靚海景。呢個舂坎角二號炮床連半球狀炮台同探照燈都係唔少人打卡地,包括小窗口、炮床等,炮台附近亦有燒烤位置,遲啲疫情後重可以去睇住海景歎BBQ呢。唔少電影、電視劇都曾到舂坎角取景,如《異度空間》、《烈火戰車》等。

舂坎角公園左邊有一條小樓梯,拾級而下,可以輕鬆到達一個天涯海角點,由拱形石壆望望海,驚濤駭浪,環境更疏乎,有如置身外國。該影相位正正係上述提過嘅探照燈座遺址,從裏面睇似足一個大型海景電視機,亦可以向左邊回望赤柱,甚至遠眺南丫島方向。

有時間可以等埋日落,或者可以去埋舂坎角沙灘睇日落,返去迴旋處時,可以向海邊方向直落,即達舂坎角沙灘。

延伸閱讀﹕赤柱大街拍拖好去處 吹海風散步勁Chill

延伸閱讀﹕大坑酒吧獨特Fusion菜 茶記美食上大枱?

延伸閱讀﹕銅鑼灣全新蕃茄濃湯麵 秘製日式冷麵清新消暑


E.A.Tips﹕

(1)可乘搭巴士路線6, 6X, 63, 65, 66, 973, 14, 260或小巴路線16A, 16M, 40, 40X, 52直達赤柱市集,6X可直接於舂坎角海灘落車,16A更可以於舂坎角慈氏護養院落車,位置更接近舂坎角炮台,不過要留意小巴班次,每班車需要等得比較耐,尾班車約為20:05,若乘搭的士或uber由赤柱直入,大概$50。
(2)走出赤柱馬坑公園,會見到巴士站同舂坎角迴旋處,沿左邊方向行,沿舂坎角慈氏護養院方向行就得,路段平坦,但為單程馬路,需小心少量車輛出入,繼續沿大斜坡路行到底就到炮台,腳程約15至20分鐘。
(3)舂坎角炮台旁邊有少量車位,可以揸車直達。
(4)炮台附近並無洗手間、補給站,不過行經舂坎角慈氏護養院附近位置就有公廁,大堂內亦有洗手間。


舂坎角公園

舂坎角道
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈與赤柱繁華成對比 舂坎角炮台環境靜謐 探射燈座似海景大電視〉中有 1 則留言

留言功能已關閉。