[sig_post_pv label=””] 個人瀏覽過
玉桂山位處港島南區，閒閒哋行幾個鐘，所需一定體力，多數係有行山經驗嘅山友挑戰，大概3星半難度，兩個人想輕鬆行吓山、睇風景，不妨行吓隔離嘅小玉桂山，難度即刻減半，只有1星至1星半難度，有天淵之別，容易上山、落山，絕對係拍拖閒遊之選。
小玉桂山又名假玉桂山、佛爺山，有指係玉桂山副峰，比起真玉桂山易去得多，可以隨時即興上山，15至30分鐘腳程即可登頂。小山丘路段基本由石屎路舖砌，梯級清晰易行，除咗初段樓梯比較細小同陡峭，其實唔難行嘅。山頂風景其實都唔輸蝕，小山頭可飽覽180度海灣，遠眺海洋公園機動遊戲，輕鬆望東博寮海峽、鴨脷洲大橋、連島沙洲鴨脷排。
【Like Facebook / MEWE 更緊貼最新資訊，一個Like一個鼓勵，支持原創文章，向Content Farm說不。】
呢座假玉桂山只得143米高，係附近居民晨運之地，亦係鴨脷洲嘅中心點，比起高196.2米嘅真玉桂山，明顯輕鬆得多。既然熱門山丘人頭湧湧，倒不如反其道而行去吓小山丘，人流極少，咁先係真正享受行山之樂。
步行小玉桂山，可從利東邨或海怡半島出發，今次由利東商場出發，經過街市、利東社區會堂，穿過平台，可沿斜路上去登山小徑，頂端右方會見到籃球場，再上去直至見到涼亭，前面有一道狹窄樓梯，沿梯級直上就可以到達玉桂山。行樓梯時，記得不時要回望休息，因為背後風景的確不俗，可輕鬆從高空望港島南風景，甚至可遠眺南丫島三支煙囪。
小玉桂山山頂都有標高柱、三角測量站，再上會見到玉桂山涼亭，然後會有幾條分岔路，其實沿幾條分岔路行都只係圍繞住小玉桂山而走，行吓觀景台或圍繞小玉桂山走，唔會盪失路。從山頂位置除咗可以望遼闊海景，重有建築中嘅地皮，完美遮擋原來廣闊嘅風景。
經過涼亭，沿樓梯向下行，為西面方向，黃昏時份可以睇埋日落，有奔向夕陽之感。樓梯前段會有條小山路，可以直通小型「停機坪」，比正式直昇機停機坪細小得多，既係打卡點，亦係安靜賞景好地方。
繼續沿樓梯向下行，全為石屎梯級，可以直達玉桂山配水庫休憩處，唔使行回頭路。沿路落山可以直達海怡半島、鴨脷洲邨，一座小山丘連接利東邨、鴨脷洲邨。
E.A.Tips﹕
（1）從窄小梯級登上小玉桂山時，若烈日當空下行長樓梯會比較容易中暑，至少帶備飲用水、防曬用品。
（2）雖然大家叫小玉桂山，但沿路山徑路牌都稱小玉桂山為「玉桂山」。
（3）去程可以乘搭巴士或小巴到利東邨巴士總站落車；回程可於鴨脷洲邨公共運輸交匯處乘搭巴士或小巴離開；甚至行去乘搭香港仔街渡再轉巴士。
（4）山路無補給點，但上斜前小平台有汽水機作補給。
（5）玉桂山配水庫休憩處遮蔭位唔多，會比較曬。
小玉桂山
鴨脷洲利東邨道利東邨東昌樓 
24hours
玉桂山配水庫休憩處
鴨脷洲利東邨道5號 24hours
玉桂山
鴨脷洲利東邨道5號 24hours
鴨脷洲橋道遊樂場
鴨脷洲 07:00 – 21:00
在〈小玉桂山連接利東海怡 15分鐘輕鬆登頂環瞰180度海灣〉中有 4 則留言
留言功能已關閉。