馬大石澗係一道馬鞍山流到大水坑嘅小石澗，澗道開揚，因湖水清澈得呈綠色，故有綠寶石之稱，屬全港9大石澗之一。炎夏時，唔少人甚至會到潭中暢泳，而石澗岩石滿佈，全長逾2公里，景觀優美。而有懸壺飛瀑之稱嘅英雄瀑更似足水濂瀑布，但今年8月有一名25歲巴基斯坦籍男子就於大水坑馬大石澗行山期間墮下重創，隨後送院不治。所以，要行一定要量力而為，莫視安全問題只會有生命危險，最好揀一條最安全嘅路線行走。
事實上，石澗深度不一，無論頭部或身體墮地都唔好啦，救護人員上山拯救行山人士亦需要時間，會影響救人嘅黃金時間，所以要注意安全，最好都係唔好跳潭玩水或為咗打卡落潭啦！
從富安花園巴士總站出發，經大水坑村小路，可以從唔同路段走入馬大石澗下游、中游、上游，而馬大石澗上游需要經過一道隱密小山徑，行約30分鐘先可以行到上去上游位置，至於英雄瀑、大水壩就要再向上行，但就比較複雜，水流亦較急，既唔適合新手，亦唔啱兩個人拍拖輕鬆遊。如果唔想濕腳，最好沿以下路線而走，同時相對比較安全。
從大水坑南街末端進入右邊小山徑入口，初段為水泥路，其後都係山路，需要穿過茂密小山林，不過大致上平坦易行，路程唔長，只係旁邊無欄杆，需要小心唔好跣親。
從實際環境睇，馬大石澗水質上幾清澈，湖水透視藍綠色，有種自然清涼感，水源由馬鞍山西馬肚流到大水坑，巨石經長期水流沖刷，逐漸變得光滑，基本上石澗隨處都係影相位，呢道安全情況下行嘅入門版澗道的確值得一遊。
而從大水坑南街穿過黃色橋引水道，行到大水坑北街，沿路直行到尾，落樓梯後穿過村屋，可以去到馬大石澗下游、中游位置，路段甚至比從大水坑北街上小山徑更安全，連小朋友都輕易行走。
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
E.A.Tips﹕
（1）馬大石澗遍佈巨石，而石同石之間相距甚遠，深淺不一，切勿跳潭，最好就唔好隨便行落石澗啦。
（2）唔少人都會喺巨石之間攀爬，但謹記要先認真評估風險，小心個人安全。
（3）兩旁山徑路段為沙泥路，要小心濕滑跣腳。
（4）無論大雨定細雨，都絕對唔適合行石澗，既容易遇上山洪暴發，亦會有路面濕滑之危。
（5）行山徑或石澗最好都係預先著防滑度高嘅鞋，重有自己垃圾自己帶走。
（6）沿大水坑南街行到尾，見到大水坑村村公所辦事處，可繼續直行，從後面進入小山徑，位置靠近上游；從左邊大水坑北街下面小路走，穿過村屋，可以去到石澗對面，為中、下游位置。
（7）如果繼續沿石澗前行，既可去到英雄瀑，亦可到達馬鞍山郊野公園。
（8）補給點要去到大水坑村附近商店。
（9）乘搭43X,81C,89C,281X,N281,84X,85X,682巴士路線或805S小巴路線，從富安花園巴士總站落車。
馬大石澗
馬鞍山 
24hours
在〈8月現墮下意外 綠寶石險變紅寶石 帶你行馬大石澗最安全路線〉中有 1 則留言
留言功能已關閉。