[sig_post_pv label=””] 個人瀏覽過
香港仔、鴨脷洲空間唔大,食肆選擇都相對少,不過其實都隱藏咗唔少街坊小店,價錢同質素上稱得上性價比高,甚至值得兩個人跨區去食!
(1)快樂茶檔
快樂茶檔靠近兆群大廈,藏於角落位置,得到唔少街坊垂青。如果食物有舊式水準,茶餐廳唔需要扮冰室都可以有懷舊冰室感覺,呢間茶記下午茶餐的確抵食,款式唔少,款款價錢介乎$20幾至$30幾,不單有斧頭生炸雞髀、西多士,更有燒鴨米線裹腹。此外,豬扒菠蘿包、奶茶紅豆冰都係幾受歡迎嘅小食、飲品。
延伸閱讀﹕香港仔抵食下午茶! 轉角街坊店必食激厚西多 邪惡炸髀畫蛇添足?
(2)果然冰室
年初由Let’s Jam一起果醬打造嘅港式冰室,名為果然冰室,午餐、晚餐有飯同意粉,下午茶更有鬆餅、招牌果醬,淨係早餐都夠豐富,既有港式,亦有西式,甚至有英式全日早餐。份量適中,質素上每樣細微地方都比後期嘅龍門冰室好,最大驚喜係雞扒竟然以生炸雞髀方式炮製,香口惹味,雖然對好多人嘅早餐嚟講係幾Heavy,不過小編就好Welcome。
延伸閱讀﹕港式茶記果然冰室年初香港仔開業 生炸式香草雞扒有驚喜
(3)Bowls cafe 寶膳餐廳
3間當中唯一位處鴨脷洲嘅寶膳餐廳,食物以西式為主,環境舒適,最啱拍拖情侶撐枱腳。以為好高檔,其實齋睇13款午市套餐,價錢只係$66至$98!既有得鋸扒,品嚐西餐中嘅肉眼扒、羊架、德國鹹豬手等,亦可試試更顯大廚功架嘅俄羅斯牛肉、蒜片蜆肉橄油意粉。套餐有餐湯、蒜蓉包、餐飲,加$32更有甜品,西餐當中嘅抵食之選!
E.A.Tips﹕
(1)乘搭街渡可以輕鬆往來香港仔、鴨脷洲,香港仔方向有巴士、小巴路線位處街渡對面。