想爺爺了

清一色現泡茶 唔賣咖啡! 觀塘廠遊迷你日系茶室 週末與情人榻榻米放空茗茶

[sig_post_pv label=””] 個人瀏覽過





觀塘工業區內Cafe比比皆是,皆因工業區舖租相宜,但要於云云Cafe中突圍並唔容易,呢間隱藏於工廠大廈內嘅全新小店就出奇制勝,唔賣咖啡,反而以茶當道,將工廈單位變成迷你茶室,室內加插Tatami後,更演變為日系風格,提供一個安靜又舒適嘅地方俾愛茶之人品茶,適合拍拖兩個人茗茶放空。

呢間港式茶館位處工廈林立嘅觀塘區內,唔提供咖啡,只賣熱茶,對比云云咖啡店甚有分別,每杯熱茶都跟足工序沖泡,無論沖泡時間、次數,抑或水溫、預熱時間,講究程度媲美咖啡。茶向來係上咗年紀嘅人先識品茗,今次裝潢陳設方面迎合愛打卡嘅年輕人,改變品茶為長輩之間嘅刻板形象,唔通係想將茗茶文化傳俾年輕一代?

甫踏入門口,盡頭日式風格小居室極吸引眼球,充滿格調,坐低可靜靜地品茶,旁邊既有品茶書籍,亦有文學書籍可供閱讀,如作者魯迅、徐志摩嘅作品,都屬編輯於中學時期睇過嘅書,睇嚟店主幾有文學修養。日式茶室內含榻榻米、日式屏風,似家庭一樣溫馨舒適,更可以打卡,既適合少女,亦適合情侶們周末閒遊工廠大廈後作休憩之處,可享受慢活。



店內清一色只有茶品,但選擇眾多,有原片茶、調配茶,當中包括綠茶、白茶、紅茶、烏龍茶、黑茶、花茶6種基本茶品,冷泡茶、Latte係僅有嘅凍茶,各款茶葉來自台灣、印度等地,大多可回沖幾次,風味不一。而一杯靚茶可放鬆心情,坐於溫馨日式茶室內,暫且忘卻節奏急速嘅城市生活,感受片刻悠閒,品茶時更疏乎。

以茶分類,喜愛飲入口稍淡、味道清香茶品嘅朋友,適合飲紅茶或白茶,味帶甘香,質感醇厚,茶味偏薄,略有餘韻;而喜愛飲濃茶或咖啡嘅朋友,就適合飲烏龍茶,皆因烏龍茶帶有啖啖炭焙香同可可香味,順滑似手沖咖啡;至於花茶就適合愛花款嘅朋友。不過,花茶基本只沖泡1至2次,而紅茶、白茶一般則可沖泡3至4次,至於烏龍茶則茶味較濃,可沖泡5至6次,每一杯都有唔同變化。比如小赤金紅茶$55 啖啖甘香,醇厚,香甜,味道持久,茶味有餘韻;而蘋果花茶$68 較清香,夠潤喉,生津止渴,不過滲出少少藥水味。

更有由上水Cafe Atma Bakery取貨嘅蛋糕,講到明聯乘推出,方便同路人飲啖茶兼食件糕!蛋糕香甜,配搭清香茶品亦適合,每件蛋糕$50,每星期款式不一,有純素選擇。當中蜂蜜蕃薯蓉日式起司蛋糕,唔會太快融化,質感濕潤,蕃薯蓉入口綿密,加上蜂蜜香甜味、芝士香,甜而不膩。

延伸閱讀﹕必試燒腩仔Bagel!上水圍村精品咖啡店ATMA避世 週末歎咖啡感受悠閒氣氛

延伸閱讀﹕觀塘工廈小確幸 台式餐廳小伊甸下午茶低至$35

延伸閱讀﹕Vintage感爆燈! 觀塘最美古董咖啡店法式風情

延伸閱讀﹕觀塘工廈平民丼飯 甲羅燒蟹膏勁飽滿

延伸閱讀﹕抗疫小店隱藏觀塘工廈 炮製超正宗台灣菜


E.A.Tips﹕

(1) 小店空間有限,只有3組茶座位置,同時只有1組為窗邊榻榻米茶座,其餘2組都係地板茶座,想打卡就要更早向店家預約啦!

(2) 留意店家只開放星期五、六日,平日一般有茶藝工作坊。


想爺爺了

觀塘觀塘道436-484號觀塘工業中心二期8樓F2室
星期一至四全日休息;星期五至日 11:00 – 19:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!