馬鞍山呢間小店裝潢似拍拖去食嘅咖啡店，幾有格調，但事實上竟然係賣車仔麵！以本味食堂命名，以年輕人為主力，裝潢有日式風格，令人舒服，食物偏偏主打港式車仔麵，以街坊客為主，價錢幾貼地，兩個人$100，始終離不開本土。
車仔麵每款餸價錢由$8、$10至$12，通通三餸起，麵底有基本粉麵之餘，更有少見嘅銀針粉、紅薯粉。每碗車仔麵不單有濃郁腩汁湯底，啖啖醇香，有生菜底，亦有自家秘製香辣汁，大中小程度任揀，夠晒自由。甚至可以加上小食如炸魚肉燒賣、火炙雞中翼、煎釀三寶、咖哩四寶等，不過價錢就可能比坊間貴。即棄獨立餐具的確係疫情下安全措施，雖然略欠環保。
秘製牛腩一半偏韌難咬，一半軟嫩，撕開牛腩，肉絲清晰可見，幾入味；香滑牛筋算軟身滑溜，易入口；清甜蘿蔔軟嫩無渣，非常入味；豬紅亦嫩滑入味，唔係一夾就散；蠔油冬菇幾厚，亦夠入味；滷水豬大腸唔太肥，算乾淨，不過不失；比較值得推介係甜酸齋，勁索湯，係最易入味嘅一款。
難得係包嘢飲，試吓普通檸檬水 $0同自家製冰糖陳皮燉檸檬 $12-$15，前者簡單清新，解渴又保暖，後者有懷舊感，冰糖甜度適中，幾健康，檸檬味足，陳皮味可重少少。
自家製冰糖陳皮燉檸檬
E.A.Tips﹕
（1）經新港城中心，穿過天橋，行去新港城中心大街3期，附近係新港城屋苑。
（2）枱面有辣味菜脯，配搭車仔麵都唔錯，自家秘製香辣汁最好先剔小辣，唔夠辣可加菜脯。
（3）落單只需用枱面marker於過膠餐牌上點餐，再交俾店員就得。
本味食堂
馬鞍山鞍祿街18號MOSTown Street新港城中心大街(3期)地下12號舖 
12:00 – 21:30 
2563 2988
在〈裝潢似咖啡店 馬鞍山街坊食堂原來食車仔麵？〉中有 1 則留言
留言功能已關閉。